Apple Россиядаги ходимларини Марказий Осиё давлатларига кўчиряпти

Apple Россия бозоридан чиқишини расман эълон қилмаган кам сонли ғарб компанияларидан бири бўлиб турибди.

Американинг Apple lnc ва Google компаниялари ўз ходимларини Россиядан бошқа мамлакатларга олиб кетмоқда, дея хабар берди «Ведомости» нашри.

Таъкидланишича, Украинадаги ҳарбий ҳаракатлар бошланганидан кейин Google ходимларига Дубайга кўчиб ўтишни таклиф қилган. Бироқ кўплаб ишчилар ноқулай иқлим шароити ва сарф-харажатларнинг қимматлиги туфайли ушбу таклифни рад этишган.

Хусусан, баъзи ходимлар Қирғизистон ва Бирлашган Араб Амирликларига кўчирилган. «‘Apple’нинг Россиядаги кўпчилик ходимлари Қирғизистонга кўчиб ўтди. 2022 йилнинг баҳорида компания асосан топ-менежерларни Дубай ва Лондонга олиб кетди. Чунки Лондонга кўчиб ўтиш арзон эмас», – дейилади хабарда.

Apple Россия бозоридан чиқишини расман эълон қилмаган кам сонли ғарб компанияларидан бири бўлиб турибди. Россия Украинада «Махсус ҳарбий операция» бошлаганидан бери компания Россия ҳудудида ўз қурилмаларининг янги моделларини сотишни тўхтатди ва Apple Pay ва бошқа бир қатор хизматларнинг ишлашини чеклаб қўйди.

Шунингдек, Apple АҚШ санкциялари туфайли Россиянинг айрим компаниялари иловаларини App Store’дан олиб ташлади. Мутахассисларнинг фикрича, кўплаб IT-компаниялар ўз ходимларини Қозоғистон ва Ўзбекистонга фаол равишда кўчиришмоқда, чунки ушбу мамлакатлар рус тилининг тарқалиши ва кўчиб ўтиш харажатлари жиҳатидан қулай ҳисобланади. Жумладан, Хитойнинг электроника ишлаб чиқарувчи Huawei компанияси ҳам ўз ходимларининг бир қисмини Россиядан Қозоғистон ва Ўзбекистонга олиб ўтган.