Москва яқинидаги масжидга намоз вақтида граната тутган эркак бостириб кирди

У намозхонларни портлатиб юбориш билан таҳдид қилган.

Москва яқинидаги Дзержинскдаги масжидга намоз пайтида қўлида граната ушлаган одам бостириб кирди. Москва вилояти полицияси тасдиқлаган маълумотда эркак масжидга кириб, қўлидаги портловчи мослама билан таҳдид қилгани айтилади.

Видеокузатув камералари ёзувида намоз вақтида бинога бир киши кираётганини кўриш мумкин. Намозхонлардан бири намозни тўхтатган, шундан сўнг бир неча киши чақирилмаган меҳмонга яқинлашган. Кўпчилик ўрнидан туриб узоқлаша бошлаган. Шундан сўнг эркак полиция томонидан қўлга олинган.

“Бугун Дзержинскийдаги масжидимизга бир киши келди. У  Ислом ҳақида ёмон сўзлаб, бизни ўлдирмоқчи эканини айтиб  бақирди. Қўлида граната, қўрқинчли эди, мусулмонларни душман деб атади”, деб ҳикоя қилган воқеа гувоҳлари.

Кейинроқ граната сохта эканлиги аниқланди, деди полиция.

“112” Телеграм-каналига кўра, бу одам маст ҳолатда бўлган. У сочини олдириш учун сартарошхонага келган, у ерда ароқ ичган ва сохта гранатани ўғирлаб олган. У намозхонага кириб, граната билан таҳдид қила бошлаган.