Патент олганлик тўғрисида «Госуслуги» орқали хабар бериш мумкин бўлади

Россия ИИВ матбуот хизматининг хабар қилишича, Россияда патент олган чет эл фуқаролари 2024 йил 7 январдан бошлаб ўз меҳнат фаолияти тўғрисида полицияга “Госуслуги” портали орқали хабар беришлари мумкин бўлади.

“2024 йил 7 январдан бошлаб федерал қонун билан қабул қилинган ўзгаришларга асосан (…), чет эл фуқаролари Россия Федерацияси Ички ишлар вазирлигининг ҳудудий органини меҳнат фаолиятини амалга ошириш тўғрисида патент берилган кундан эътиборан икки ой ичида хабардор қилишлари шарт. Бундай билдиришнома нафақат қоғозда (тўғридан-тўғри ёки почта орқали жўнатилган), балки Ягона давлат ва коммунал хизматлар порталидан фойдаланган ҳолда электрон ҳужжат кўринишида ҳам тақдим этилиши мумкин”, — дейилади хабарда.

Ички ишлар вазирлигининг изоҳлашича, давлат хизматлари орқали ариза топширишда чет элликлар милиция бўлимига шахсан мурожаат қилишлари шарт эмас.

Ушбу мажбурият бажарилмаган тақдирда, чет эл фуқаросига берилган патент бекор қилинади, дея эслатган вазирлик.