Пермда фуқарони калтаклаган миграция бўлими раҳбари жазо олди

Воқеа Пермнинг Индустриальний туманида, миграция бўлими (ОВМ) жойлашган бинога кираверишда содир бўлган. Полиция майори билан фуқаро ўртасидаги можарога полициячининг келган одамни ичкарига киритишни истамагани сабаб бўлган. Полициячи ичкарида полга бетон қуйилгани ва фуқаро унга зарар етказиши мумкинлигини иддао қилган.

Айбланувчи сифатида кўрсатилган Ирина Пермякова фуқарони темир эшик билан қисиб, бир неча марта оёғи билан зарба берган.

Жабрланувчининг соғлиғига қисман  зарар етган.

Суд ҳукмида И. Г. Пермякова бошқа шахслар гувоҳлигида жабрланувчини беҳаё сўзлар билан  ҳақорат қилгани ҳам айтилган. Бундан ташқари, суд “фуқароларнинг бўлим биноларига киришини чеклаш тўғрисидаги буйруқ И.Г. Пермякова томонидан ўзбошимчалик билан қабул қилинганлигини” таъкидлайди.

Бироқ судланувчи Пермякова ўз айбини тан олмаса-да, хизматдан четлатилди. Суд уни уч йил шартли қамоқ жазосига ҳукм қилди. Шунингдек, Пермяковадан жабрланувчи фойдасига маънавий зарарни қоплаш тарзида 20 минг рубл ундирилди.