Россия паспортини олган 15 нафар муҳожирга дарҳол ҳарбийга чақирув қоғози берилди

Санкт-Петербургда 15 нафар муҳожир Россия фуқаролигини қабул қилди ва ўша вақтнинг ўзида чақирув қоғозини олди, деб хабар берган “Фонтанка” нашри.

Тадбир давомида Россиянинг янги фуқаролари Россия Федерацияси Конституциясига риоя қилишга ва мамлакат фуқароси бурчларини, жумладан, давлат мустақиллигини ҳимоя қилишга қасамёд қилишди. Тадбирда миграция хизмати ходимлари иштирок этиб, қасамёд белгиланган тартибда қабул қилинганлигини тасдиқлашди.

Қасамёд қилиш ва паспортлар берилганидан сўнг, Санкт-Петербург гарнизони бўйича Тергов қўмитасининг ҳарбий тергов бўлими вакиллари собиқ хорижликларга чақирув қоғозларини топширдилар.

Аввалроқ Екатеринбургда полиция рейдларидан сўнг 400 дан ортиқ муҳожир чақирув қоғози олган эди.