Tojikiston Rossiya Federatsiyasidagi muhojirlar bilan bog‘liq vaziyatdan xavotir bildirdi

Tojikiston bosh vaziri Qohir Rasulzoda Dushanbeda boʻlib oʻtgan ikki davlat hukumatlararo komissiyasi yigʻilishida Tojikiston Rossiya Federatsiyasida migratsiyani tartibga solish bilan bog‘liq tadbirlar chog‘ida respublika fuqarolari bilan yuzaga kelgan vaziyatdan xavotirda ekanini maʼlum qildi.

“Rossiyada migratsiya sohasini tartibga solish boʻyicha chora-tadbirlar davomida fuqarolarimizning asosiy huquq va erkinliklarining keng miqyosda buzilishi tendentsiyasidan xavotirdamiz. Tojikiston fuqarolarini deportatsiya qilish xavfsizlikni saqlashning noaniq tushunchasi ostida kuchayib bormoqda”, dedi u.

Bosh vazirning soʻzlariga koʻra, respublika fuqarolari, jumladan, rasmiy delegatsiyalar aʼzolari, talabalar, qariyalar va bolalar Rossiyaga kirishda chegarada soatlab va hatto kunlar davomida ushlab turiladi.

Shu bilan birga, deya davom etdi Rasulzoda, rossiyalik ish beruvchilar tomonidan Tojikistondan mehnat resurslariga bo‘lgan so‘rovlar ortib borayotgani kuzatilmoqda. Masalan, hozirgina Tataristondan katta delegatsiya shu maqsadda Tojikistonga tashrif buyurdi.

“Biz migratsiya sohasidagi o‘zaro hamkorlik sohasida chinakam samarali yechimlarga o‘tishimiz kerak, bu do‘st xalqlarimiz o‘rtasidagi o‘zaro anglashuvni mustahkamlashga yordam beradi va mamlakatlarimiz iqtisodiyotiga foyda keltiradi”, — deya xulosa qilgan Rasulzoda.

Bunga javoban, Rossiya tomonidagi komissiya hamraisi, Rossiya Federatsiyasi hukumati raisi o‘rinbosari Marat Xusnullin: “Mamlakatimizda endi noqonuniy migratsiya boʻlmasligini aniq tushunishimiz kerak, yaʼni biz ishlarni tartibga solamiz, mehnat resurslari ustida ishlaymiz, bizga mehnat resurslari kerak, lekin bu mutlaqo qonuniy tarzda amalga oshiriladi”, dedi.

Uning soʻzlariga koʻra, bu masala boʻyicha alohida ishchi guruh tuzish zarur, “har ikki davlat xavfsizligini taʼminlash bilan bogʻliq barcha harakatlarimizni belgilab olishimiz, kim kelayotganini, qanday kelayotganini tushunishimiz, yordam berishimiz kerak”, deb izohlagan Xusnullin.

Tojikiston Mehnat vazirligi maʼlumotlariga koʻra, respublikadan Rossiya Federatsiyasiga ketayotgan mehnat muhojirlari soni yilning birinchi yarmida 2023-yilning shu davriga nisbatan 15 foizga kamaygan. Vazirlik maʼlumotlariga koʻra, 2024-yilning birinchi olti oyida Tojikistonning 17 mingdan ortiq fuqarosi qonunlarni buzgani uchun Rossiya Federatsiyasidan chiqarib yuborilgan.