15 та машинани пачоқлаган ўзбекистонликка яна бир айблов қўйилди

Воқеа 1 феврал куни кечқурун Юнтоловское шоссесида содир бўлган.

Санкт-Петербургнинг Приморский туманида 15 га яқин автомобил ва автобусга зарар етказган мигрантга нисбатан полиция ходимларига пора беришга уриниш бўйича иш очилди. Ўзбекистонлик ҳайдовчи полицияга пул таклиф қилиб, жавобгарликдан қочишга уринган.

Воқеа 1 феврал куни кечқурун Юнтоловское шоссесида содир бўлган. Эркак тўқнашувларни бошлаганидан сўнг, у қўлга олиниб, полиция бўлимига олиб кетилган. Тергов давомида терговчилар томонидан Россия Федерацияси Жиноят кодексининг 291-моддаси 3-қисми билан (қонунга хилоф ҳаракатлар ёки ҳаракатсизлик учун пора таклиф қилиш) бўйича жиноят иши қўзғатилган.

33 ёшли ўзбекистонлик маст ҳолатда кичик “Мерседес” русумли юк машинасида дўстини уйига ташлаб чиқа бошлаганида тўхтаб турган машиналарга бориб урилган. Ўндан ортиқ машинага зарар етказган муҳожир ниҳоят катта йўлга чиққан, бироқ шу заҳоти бошқарувни йўқотиб, қарама-қарши йўлга чиқиб, автобусга бориб урилган.

Меҳнат мигрантига Маъмурий жавобгарлик тўғрисидаги кодексининг тўртта моддаси бўйича  маъмурий баённомалар қўлланилган. Уларни қайд қилиш чоғида муҳожир полиция ходимига 25 минг рубл бериб, шу орқали жавобгарликдан қутилиб қолишга уринган.

Муҳожирларга маслаҳатимиз, алкогол ичимликларни ичиб, автомобиль рулига ўтирманг. Мабодо бирор қонунбузарлик содир этсангиз, полицияга пора таклиф қилманг! Арзимаган маъмурий жазо жиноий жавобгарликка айланиб кетиши мумкин.