2024-yilda muhojirlar o’limi rekord darajaga yetdi – BMT agentligi

BMT migratsiya agentligi ma’lumotlariga ko’ra, o’tgan yili 9 mingga yaqin odam chegarani kesib o’tishga urinib halok bo’lgan.

O’lganlar soni ketma-ket beshinchi yil davomida yangi dahshatli rekord o’rnatdi. 2020-yildan buyon migratsiya yo‘nalishlarida halok bo‘lganlar soni ikki baravar ko‘paydi.

Xalqaro Migratsiya Tashkiloti (XMT) 2024-yilda 8938 nafar muhojir o‘limini qayd etgan. XMT juma kungi bayonotida aytilishicha, ko’plab o’limlar qayd etilmagan yoki hujjatsiz qolayotganini hisobga olsak, haqiqiy qurbonlar soni ancha yuqori.

«O’lganlar sonining ortib borayotgani o’z-o’zidan dahshatli, ammo har yili minglab halok bo‘lganlarning shaxsi noma’lum qolayotgani yanada fojiali», degan XMTning bedarak yo’qolgan muhojirlar loyihasi koordinatori Julia Blek.

XMT Bosh direktorining amaliyotlar bo‘yicha o‘rinbosari Ugochi Daniels shunday deydi: “Dunyoning ko‘p joylarida o‘lganlar sonining ortib borayotgani yanada fojiali yo‘qotishlarining oldini oladigan keng qamrovli xalqaro javob choralariga ehtiyoj borligini ko‘rsatadi”.

Osiyoda eng ko’p o’lim qayd etilgan – 2788 kishi, O’rta dengizida 2452 kishi va Afrikada 2242 kishi. Amerika qit’asi bo’yicha yakuniy raqamlar hali aniq emas, ammo 2024-yilda kamida 1233 o’lim (shu jumladan Karib dengizida 341) sodir bo’lgan.

Yevropada kamida 233 nafar, Kolumbiya va Panama o‘rtasidagi Darien darasida 174 nafar muhojir halok bo‘lgan.

XMT ma’lumotlariga ko’ra, migrantlar – bu o’z yashash joyini ayrim sababga ko’ra va istalgan muddatga, ixtiyoriy yoki majburiy ravishda tark etadigan odamlar. Ba’zilar urush yoki zo’ravonlikdan qochib, boshpana so’rashadi.

Rekord darajadagi qurbonlar soni haqidagi xabar agentlik butun dunyo bo‘ylab ko‘plab «hayotiy muhim» dasturlarni to‘xtatib qo‘ygani va AQSh yordamining qisqarishi tufayli yuzlab xodimlarni ishdan bo‘shatishini e’lon qilganidan bir necha kun o‘tib e’lon qilindi.

Jenevada joylashgan XMT AQShning yordami keskin qisqartirilganidan jabr ko’rgan muhojirlarga yordam beradigan bir nechta guruhlardan biridir.