Москва вилоятида мигрантлар учун патент нархи ошди

Москва вилоятида чет элликлар учун иш патентининг нархи оширилди. 2024 йилнинг 1 январидан мигрантлар 900 рубл кўпроқ – 7500 рубл тўлаши лозим бўлади. Бундай қарор Москва вилоят думаси депутатлари томонидан қабул қилинди.

Патент нархини ошириш минтақавий бюджетга қўшимча равишда 2,5 миллиард рубл олиб келиш имконини беради. Умуман олганда, патентлардан 22,6 миллиард рубл фойда олиш кутилмоқда. Меҳнат патенти – бу Россияда ишлашни истаган чет эл фуқароси томонидан тузилган ҳужжат. У мамлакатга визасиз кириш ҳуқуқига эга бўлганлар томонидан сотиб олинади.

Евросиё иқтисодий иттифоқига аъзо давлатлар фуқаролари патентсиз ишлаши мумкин. Бу Беларус, Арманистон, Қирғизистон ёки Қозоғистон паспортига эга бўлган фуқароларга тегишли. Мамлакатга виза билан кираётганлар ҳам ишлаш учун рухсат олиш учун ариза топширишлари керак.