Регистрацияни сохта печат туфайли узайтира олмаслик ҳолатлари кўпайди

Дилноза Москва шаҳри, Медведково районида 9 ойдан буён патент тўлаб, яшаб келади. Меҳнат шартномаси бор. Уй эгаси билан бирга шу кунгача патенти асосида “регистрация”ни узайтириб келаётганди. Аммо мана 10-15 кундирки, навбатдаги ойларга “регистрацияси”ни узайтиролмаяпти. Одатдагидек уй эгаси билан бирга патент, меҳнат шартномаси ва бошқа ҳужжатларини олиб ИИВ бўлимига борганида унга “паспортдаги эски штамплари сохталиги учун” регистрацияни узайтиришмаяпти.

Дилнозанинг ўзига эса сохта ҳужжат учун жиноий жавобгарлик ҳақида огоҳлантириш беришган. Уй эгасининг “Госуслуги”си орқали ҳам регистрацияни узайтира олишмаган. Бундай вазиятда нима қилиш керак? Шу ҳақида фикр юритамиз.

Ҳақиқатдан ҳам сохта печатлар учун Россия қонунчилигида жиноий жавобгарлик бор. 327 УК РФ моддасига кўра сохта печатлар туфайли 5 йилгача қамоқ жазоси ёки жарима билан жазоланиш мумкин. Шунинг учун паспортингизга сохта печатларни қўйишни қатъиян тавсия қилмаймиз.

Мигрантлар орасида ҳалигача патент бўлишига қарамай, “регистрацияни” фақат чегарага бориб-келиб узайтириш мумкин, деб ўйлайдиганлар бор. Оқибатда ҳар уч ойда чегарага бориб-келиш малол келганидан “паспортнинг ўзи чегарага бориб келиши”ни ваъда қиладиган шахсларга ишониб қолишади. Бундай ёлғон ваъдаларга ишониш мигрантлар учун жиноий жавобгарлик билан тугаши мумкин. Эслаб қолинг, паспорт эгасисиз чегарага бориб келиши мумкин эмас. Бошқаларнинг ёлғонига ишониб, жиноий жавобгарликка тортилиб қолманг.

Регистрацияни чегарага бормай узайтириш учун эса патент расмийлаштиринг. Патенти борлар чегарага бормай, регистрацияларини бир  йилгача узайтиришлари мумкин. Агар паспортингизда эски сохта печатлар бор бўлса, унда паспортингизни тезроқ алмаштиринг. Ҳозир Ўзбекистон ва бошқа Марказий давлатларнинг Россиядаги консулликлари орқали янги паспорт олиш муаммо эмас.