Moskvada Shahar kuni: bepul dam oladigan joylar

Moskva oʻz tugʻilgan kunini keng nishonlashga tayyorlanmoqda, siz esa ushbu bayram dam olish kunlarini bepul va qiziqarli oʻtkazishingiz mumkin. Shu kunlarda poytaxt bogʻlari, muzeylari va koʻchalarida oʻnlab bepul tadbirlar boʻlib oʻtadi. Yaxshi dam olish uchun siz oddiy yoʻnalish tuzib olishingiz va eng qiziqarli maydonchalarga tashrif buyurishingiz mumkin.

Avval shahar markaziga — Strastnoy, Petrovskiy yoki Chistoprudnыy xiyobonlariga boring. Bu yerda «Moskvada yoz» loyihasi doirasida ijodiy ustaxonalar ishlaydi. Bayram munosabati bilan maxsus ravishda 5- va 6-sentyabr kunlari xiyobonlarda «Tugʻilgan kuning bilan, Moskva!» dasturi tayyorlangan. Siz 60 ta bepul plenerdan birida bepul ishtirok etishingiz va 45 daqiqa ichida xolst yoki A3 formatidagi qogʻozda rasm chizishingiz mumkin. Mashgʻulotlar har soatda soat 12:00 dan boshlanadi, oldindan roʻyxatdan oʻtish shart emas. Yodda tuting, molbertlar bilan bir vaqtning oʻzida faqat oʻn kishigacha ishlashi mumkin.

Shundan soʻng Poklonnaya goradagi Gʻalaba muzeyiga tashrif buyuring. Bu yerda 5- va 6-sentyabr kunlari barcha xohlovchilar uchun «Moskva uchun jang. Birinchi gʻalaba!» ekspozitsiyasi boʻylab bepul ekskursiyalar tashkil etiladi. Ekskursiyalar har soatda soat 10:20 dan 18:20 gacha oʻtkaziladi. Shuningdek, muzey dasturida sizni «Moskva ortimizda» mavzusidagi «Eruditorium» intellektual oʻyini, 1945-yildagi «Assalom, Moskva!» musiqiy filmi namoyishi va «Zal polkovodtsev» –  Sarkardalar zalida «Moskva haqida 85 ta qoʻshiq» bayram kontsert marafoni kutmoqda. Muzey fondlaridan keltirilgan 30 ta nodir osori-atiqalarni koʻrish uchun yangi ochilgan «Assalom, Moskva» koʻrgazmasiga albatta kiring.

Agar siz sport yoki fanga qiziqsangiz, VDNXga borishingiz kerak. Baliq ovlash ishqibozlari 5-sentyabr kuni Ostankino koʻliga tashrif buyurishlari lozim, u yerda baliqchilik sporti festivali boʻlib oʻtadi. Tantanali ochilish soat 10:00 da boshlanadi, musobaqalarning oʻzi soat 12:00 da start oladi, natijalar esa 14:30 da e’lon qilinadi. Shunga e’tibor beringki, ishtirok etish uchun arizani 4-sentyabrgacha topshirishga ulgurish kerak edi, oʻzingiz bilan esa sadok (baliq solinadigan toʻr), yem, xoʻrak va ikkita qarmoq olib kelishingiz lozim. Shuningdek, VDNXdagi «Kosmonavtika va aviatsiya» markazida go oʻyini boʻyicha Moskva kubogini tomosha qilishingiz mumkin. Ushbu turnir 1978-yildan beri oʻtkazib kelinmoqda, 6-sentyabr kuni esa bu yerda yangi boshlanuvchilar uchun ochiq mahorat darsi tashkil etiladi. Xuddi shu kuni «Atom» muzeyida «FestTex-2026» fan va texnologiyalar festivaliga albatta tashrif buyuring, u yerda sizni MFTI olimlarining ma’ruzalari va professor Nikolyaning shousi kutmoqda.

Hamyonbop xaridlar qilish uchun 5- va 6-sentyabr kunlari Rossiyaning 40 dan ortiq hududlaridan yangi mahsulotlar keltirilgan 25 ta Moskva yarmarkasidan biriga tashrif buyurishingiz mumkin. Sotuvdan oldin barcha mahsulotlar davlat veterinariya xizmati mutaxassislari tomonidan tekshiriladi. Altufev shossesidagi yarmarkada Tolyatti kolbasalarini 25% chegirma bilan sotib olishingiz mumkin. Profsoyuznaya koʻchasida istalgan goʻsht mahsulotini sotib olganingizda sizga tuxumlarni bepul sovgʻa qilishadi. Otradnaya koʻchasi va Koptev bulvarida esa barcha turdagi mahsulotlarga 20% chegirma olasiz. Orexovыy bulvarida asal oʻyinida ishtirok etishingiz mumkin, Semenovskaya maydonida Velikiy Novgorod pishloqlarini chegirma bilan sotib olasiz, «Alma-Atinskaya» metrosi yaqinida esa Tambov viloyatidan keltirilgan fermer sabzavotlarini topasiz.

Xaridlardan soʻng poytaxt markazi boʻylab yoqimli piyoda fotosayr tashkil qilishingiz mumkin. Yoʻlingizni Ostojenkadagi «Multimedia-art-muzeyi»dan boshlang, u yerda 9-sentyabrgacha II Xalqaro «Kelajak san’ati» biyennalesi ishlamoqda. Muzeydan keyin Kekusheva qoʻrgʻoni va Pertsovaning daromad uyi yonidan Patriarx koʻprigi tomon oʻting, sayrni esa Moskva daryosi va Kremlning eng chiroyli panoramali suratlari chiqadigan «Zaryade» bogʻidagi muallaq koʻprikda yakunlang.

Yakshanba kuni, 6-sentyabrda, siz albatta Janubi-Sharqiy okrugdagi Moskvaning 850-yilligi bogʻiga, «Imkoniyatlar hududi» bayram festivaliga borsangiz boʻladi. Tashkilotchilar mehmonlar uchun 30 dan ortiq dastur tayyorlashgan, ular qatorida tarixiy viktorina, yoga boʻyicha mashgʻulotlar, kokoshnik va broshkalar yasash boʻyicha mahorat darslari, robotlar koʻrgazmasi, qutqaruvchi itlarning chiqishlari va bayram kontserti bor. Kechqurun siz raqs fleshmobida ishtirok etishingiz va «Men Moskva boʻylab sayr qilyapman» filmini tomosha qilishingiz mumkin. Ushbu maydonchalarning barchasiga kirish mutlaqo bepul, batafsil jadvalni esa «Moskvada yoz» – «Leto v Moskve» loyihasi saytidan yoki «Mosbilet» servisidan topish mumkin.