АҚШдаги сиёсий зиддият ҳажми кенгаймоқда

Техас губернатори ҳукуматнинг чегарадан тиканли симларни олиб ташлаш талабини бажаришдан бош тортди. Техас штати қарорини АҚШнинг 25 штати губернаторлари қўллаб-қувватламоқда.

Америкадаги 25 штатнинг республикачи губернаторлари АҚШ президенти Жо Байден маъмуриятини Мексика билан чегара ҳудудида ҳимоя қилишдан ва ноқонуний миграцияга қарши курашишдан бош тортаётганликда, кураш истаги йўқлигида айбламоқда. Губернаторларнинг биргаликдаги мурожаати Республикачи губернаторлар уюшмаси сайтида эълон қилинган.

“Қонун устуворлигини қўллаб-қувватлаш ва чегараларимизни ҳимоя қилиш ўрнига, Байден маъмурияти Техас штатини ноқонуний мигрантлар, гиёҳванд моддалар траффиги ва террорчилар оқимидан Америка фуқароларини ҳимоя қилиш чораларини кўргани учун судга берди”, дейилади у баёнотида.

Мурожаат муаллифлари Техас губернатори Грег Эбботтга бирдамлик билдиришган. Техас губернаторининг буйруғи билан 2023-йил ёзида Мексика билан чегарадаги Рио-Гранде дарёси бўйлаб сузувчи тиканли симли тўсиқ ўрнатилган эди.

Ўтган йилнинг июль ойида АҚШ Адлия вазирлиги Техас ва Эбботтга қарши даъво аризасида деворни олиб ташлашни талаб қилган. Агентликнинг таъкидлашича, тўсиқ юк ташиш ва жамоат хавфсизлигига таҳдид солади. Август ойида сузгичлар орасидан чегарани кесиб ўтишга уринаётганда ҳалок бўлган икки кишининг жасади топилгани ҳақида хабар берилган эди

22 январь куни АҚШ Олий суди федерал ҳукумат тарафида бўлиб, тўсиқларни олиб ташлашни буюрди, аммо Техас губернатори аксинча Мексика билан чегарадаги тўсиқларни янада мустаҳкамлашга ваъда бериб, штат ўзини ҳимоя қилиш учун конституциявий ҳуқуққа эга эканлигини таъкидлади.