АҚШга кириш қоидалари ўзгарди

Америка Қўшма Штатларига келаётган 2 ёшдан юқори бўлган барча йўловчилар COVID-19 га қарши эмланганлиги тўғрисидаги ёки эмланишдан озод қилинганлиги ҳақидаги анкетани тўлдиришлари керак.

Жорий йилнинг 8 ноябридан бошлаб АҚШнинг Касалликларни назорат қилиш ва профилактика маркази (Centers for Disease Control and Prevention, CDC) ва Транспорт хавфсизлиги бошқармаси (Transportation Security Administration, TSA) кўрсатмасига биноан Америка Қўшма Штатларига келаётган 2 ёшдан юқори бўлган барча йўловчилар COVID-19 га қарши эмланганлиги тўғрисидаги ёки эмланишдан озод қилинганлиги ҳақидаги анкетани тўлдиришлари керак. Бу талаб АҚШ фуқаролигига эга бўлганлар ва имигрантлар учун амал қилмайди.

Мазкур анкета ҳаво кемасига чиқишдан олдин авиакомпания вакилларига тақдим этилиши лозим. Анкетани тўлдирмаслик, нотўғри ва ёлғон маълумотларни келтириш рейснинг кечикишига, йўловчининг парвоздан четлаштирилишига ва келажакда АҚШга киришга рухсат берилмаслигига олиб келиши мумкин.

Шунингдек, бундай йўл тутган ҳамда анкетага маълумот киритиш талабларига риоя қилмаган йўловчи АҚШнинг федерал қоидаларига кўра жиноий жавобгарликка ва қамоқ жазосига тортилиши мумкин. Бу ҳақда Uzbekistan Airways матбуот хизмати хабар қилди.