Мақола

802 30/07/2022

Халқаро пластик карталардан нақд пул ечиб олиш учун «Капиталбанк» 0,7 фоиз, «Ипак Йўли» банки эса 1 фоиз миқдорда комиссия ўрнатди, деб хабар беради «Газета.уз».

Ўзбекистонда айрим банк кассалари ва банкоматларидан, валюта ҳисобварағидан нақд пул ечиб олишда карта рақамидан келиб тушган пул маблағларидан комиссия жорий этиш бошланди. Банклар буни нақд хорижий валюта муомаласини тартибга солиш билан изоҳлади.

Хусусан, 27 июлдан бошлаб «Капиталбанк» Visa халқаро пластик карталаридан касса ва терминаллар орқали нақд валюта ечиб олиш учун 0,7 фоизлик комиссия жорий қилган бўлса, «Ипак йўли» банки 28 июлдан бу 1 фоиз миқдорида бўлишини маълум қилди.

«28 июлдан эътиборан нақд хорижий валюта муомаласини тартибга солиш мақсадида «Ипак йўли» банки Visa/Mastercard/UnionPay карталаридан «Ипак йўли»  банки кассалари ва банкоматларидан, валюта ҳисобварағидан нақд пул ечиб олишда, «Ипак йўли» банки тизими ичида мижознинг карта рақамидан келиб тушган пул маблағларидан 1% миқдорида комиссия жорий этиш тўғрисида вақтинчалик қарор қабул қилингани ҳақида хабардор қиламиз», — дейилади «Ипак Йўли» изоҳида.

Иқтисодчи Отабек Бакировнинг сўзларига кўра, ўтган ҳафтада қатор банкларда халқаро пул ўтказмалари бўйича муаммолар кузатила бошлагач, баъзи «спекулянтлар» нақд валюта ечиб олиш учун асосий урғуни халқаро пластик карталарга қарата бошлашди.

«Чунки банклар пул ўтказмалари ва айирбошлаш шохобчалари орқали нақд валюта беришда қийинчиликларга дуч кела бошлаган бўлсада, халқаро пластик карталардан нақд валюта ечишга ҳеч қандай чеклов ва комиссиялар ўрнатишмаганди. Табиийки, «спекулянтлар» энди бу текин «лазейка»дан фойдаланишга ўтишди. Энди буёғига комиссия тўлаш керак бўлади», — деди у.

Унинг фикрича, бошқа босимга дуч келаётган банклар ҳам халқаро пластик карталардан нақд валюта ечиш учун комиссия ўрната бошлаши мумкин.

Эрининг ўчини боласидан олаётган аёллар

Навигация