«Amina» ilovasi Rossiyaning 11 ta hududida migrantlar uchun majburiy boʻladi

Rossiyaning 11 ta hududida «Amina» mobil ilovasi migrantlar uchun majburiy boʻladi. Ushbu dastur xorijiy fuqarolarning mamlakatga kirishini va ularning keyingi harakatlanishini nazorat qiladi.

Ilova vizasiz mamlakatlardan ishga kelayotgan odamlarni migratsiya hisobiga olish va raqamli nazorat qilish uchun yaratilgan. «Amina» ilovasi orqali migrantning geolokatsiyasi Ichki ishlar vazirligiga uzatiladi. Dastur chet el fuqarosining haqiqiy turgan joyi u koʻrsatgan manzilga mos kelishi yoki kelmasligini avtomatik ravishda tekshiradi.

Dastlab ushbu tizim Moskva va Moskva viloyatida ishga tushirilgan edi. Endi u mamlakatning yana 11 ta hududidagi yirik transport, ayniqsa aviatsiya tugunlarida joriy etilmoqda. Agar telefonda «Amina» ilovasi ishlamasa, bu migratsiya rejimini buzish deb hisoblanishi va muhojir mamlakatdan chiqarib yuborilishi mumkin.

Moskva shahri meri Sergey Sobyanin Rossiya chegarasini kesib oʻtishda migrantlar barmoq izlari va raqamli fotosuratlar topshirishini ta’kidladi. Biometriya yordamida chegarada kirishi taqiqlangan yoki qoʻlga olinishi kerak boʻlgan qoidabuzarlar aniqlanadi. Bundan tashqari, Rossiyada migrantlarga patent berish jarayonida genetik ma’lumotlar yigʻiladi.

Ushbu ma’lumotlar ilgari sodir etilgan jinoyatlarni ochishga yordam beradi. Hukumatga jinoyatchilikka qarshi kurashishda zamonaviy texnologiyalar, jumladan, videokuzatuv, sun’iy intellekt va yuzni tanish tizimlari ham yordam beradi.