AQSh Tojikiston, Qirg’iziston va Turkmaniston fuqarolari uchun viza depozitini joriy qilmoqda

2026-yil 21-yanvardan boshlab, sayyohlik yoki ish vizasi bilan Qo’shma Shtatlarga sayohat qilishni rejalashtirgan Tojikiston va Qirg’iziston fuqarolari 5000 dan 15000 dollargacha naqd pul depozitini qo’yishlari shart bo’ladi. Shunga o’xshash talab Turkmaniston fuqarolari uchun ham joriy etildi.

Depozit miqdori 5000, 10000 yoki 15000 dollar bo‘lib u konsullik xodimi bilan suhbat asosida aniqlanadi. Konsullik xodimi ariza beruvchiga miqdor haqida ma’lumot beradi va to’lov havolasini taqdim etadi.

Depozit faqat AQSh G’aznachilik Departamentining rasmiy tizimi, pay.gov orqali to’lanishi mumkin. AQSh rasmiylari boshqa veb-saytlar orqali to’langan mablag’larning xavfsizligi uchun javobgar emasliklari haqida ogohlantirmoqda. Agar biror kishi konsullik xodimining roziligisiz to’lasa, pul qaytarilmasligi mumkin.

Biroq, depozit qo’yish viza kafolatini bermaydi. Ariza beruvchiga Qo’shma Shtatlarga kirishga ruxsat berilmasa, vizaning amal qilish muddati davomida mamlakatga kira olmasa yoki belgilangan muddat ichida Qo’shma Shtatlardan chiqib ketsa, pul qaytariladi.

Ushbu chora qo’llaniladigan mamlakatlar fuqarolariga qo’shimcha cheklovlar qo’llaniladi. Qo’shma Shtatlarga kirish va chiqish faqat uchta – Nyu-Yorkdagi Kennedi, Vashingtondagi Dulles va Bostondagi Logan xalqaro aeroportlari orqali amalga oshiriladi.

AQSh Davlat departamenti yangi chora viza qoidalarini buzish holatlarini, ayniqsa, muddatidan ortiq qolish holatlarini kamaytirishga qaratilganligi bilan izohlamoqda.

Viza depozit dasturi 2025-yil avgust oyida sinov dasturi sifatida ishga tushirilgan va dastlab Malavi va Zambiya fuqarolarini qamrab olgan edi. Keyinchalik u B-1/B-2 vizalarining tez-tez buzilishi tufayli kengaytirildi. Endi Tojikiston, Qirg’iziston va Turkmaniston ham ushbu mamlakatlar ro’yxatiga qo’shildi.