Боливия, Колумбия ва Чили Ғазодаги қотилликларга норозилик сифатида Исроилдан элчиларини чақириб олди

Лотин Америкаси давлатлари зўравонликни қоралаб, ўт очишни тўхтатишга чақиришди, Исроил бунга ҳали изоҳ бермади.

Сешанба куни Боливия Исроилнинг Ғазо секторидаги ҳарбий ҳаракатлари туфайли у билан дипломатик муносабатларини узганини эълон қилди. Шу билан бирга, Колумбия ва Чили музокаралар учун Исроилдаги элчиларини чақириб олди. Жанубий Америка давлатлари Исроилнинг Ғазодаги ҳарбий амалиётларини кескин танқид қилиб, бунинг натижасида фаластинлик тинч аҳоли қурбон бўлаётганини қоралади.

Боливия ташқи ишлар вазири ўринбосари Фредди Мамани матбуот анжуманида мамлакат Исроилнинг Ғазо секторидаги тажовузкор ва номутаносиб ҳарбий ҳужуми сифатида қабул қилган норозилик ва қоралаш шакли сифатида Исроил билан дипломатик муносабатларни узишга қарор қилганини маълум қилди.

Ҳар учала давлат ҳам зудлик билан ўт очишни тўхтатишга чақирди. Боливия ва Чили жабрланган ҳудудга гуманитар ёрдам етказилишини қўллаб-қувватлади ва Исроилни халқаро ҳуқуқни бузганликда айблади. Колумбия президенти Густаво Петро, илгари Тwиттер номи билан танилган Х ижтимоий тармоғидаги постида ҳужумларни “Фаластин халқининг қирғини” деб таърифлади. Исроил Ташқи ишлар вазирлиги бу воқеаларга ҳозирча изоҳ бермади.

Лотин Америкасининг бошқа давлатлари, жумладан, Мексика ва Бразилия ҳам ўт очишни тўхтатишга чақирмоқда. Бразилия президенти Луиз Инасиу Лула да Силва жума куни Исроил бош вазирини Ғазо секторини йўқ қилишда айблаб, танқид қилди.