Boshqirdiston «migrant» asalarilardan xavfsiramoqda

Boshqirdistondagi asalarichilar bozorda Markaziy Osiyodan olib kelingan asalarilarning paydo bo‘lishidan xavotirda. Mahalliy ekspertlarning fikricha, bu boshqird asalining sifatiga ta’sir qilishi va noyob mahalliy asalari zotiga zarar yetkazishi mumkin.

Boshqird asalarisi eng qadimgi va Rossiya iqlimiga eng chidamlilaridan biri hisoblanadi.

Mintaqa veterinariya xizmatlari ma’lumotlariga ko‘ra, haqiqatan ham ayrim hududlarda O‘zbekiston, Qirg‘iziston va Qozog‘istondan asalari oilalarini noqonuniy olib kirish holatlari qayd etilgan. Rossiyada kasallik va parazitlar, jumladan, asalarichilik uchun jiddiy xavf tug‘diruvchi varroa kanasi tarqalishidan xavotirlar tufayli bunday import 2023-yildan boshlab rasman taqiqlangan.
Mahalliy asalarichilarning ta’kidlashicha, osiyolik asalarilar sovuqqa nisbatan kamroq chidamli, kasalliklarga ko‘proq moyil bo‘ladi va infeksiyalarni olib kelishi mumkin. Bundan tashqari, mahalliy zotlar bilan chatishtirish boshqird asalarilarning o‘ziga xos xususiyatlarini yo‘qotishiga olib kelishi mumkin.

Biroq, ba’zi ekspertlarning ta’kidlashicha, «asalning buzilishi» haqidagi da’volar har doim ham ilmiy asoslanmaydi. Rossiya asalarichilik akademiyasi mutaxassislarining fikriga ko‘ra, past sifatli asal ko‘pincha asalarilarning kelib chiqishi bilan emas, balki noto‘g‘ri ishlov berish va qayta ishlash usullari bilan bog‘liq.

Shunga qaramay, Boshqirdiston hukumati hasharotlarning noqonuniy olib kirilishining oldini olish maqsadida asalari boqiladigan joylarda tekshiruv va reydlar o‘tkazmoqda. Mutaxassislarning hisob-kitoblariga ko‘ra, Rossiyada noqonuniy asalari savdosi bozori yiliga 1,5 milliard rublgacha yetishi mumkin.

Shunday qilib, muammo murakkabligicha qolmoqda: bir tomondan, bu mahalliy zot va asal sifatini saqlab qolish bo‘lsa, ikkinchidan, kasalliklar tarqalishining oldini olish va boshqird asaliga bo‘lgan ishonch pasayishining oldini olish uchun asalarilarning importi va karantini ustidan nazoratni o‘rnatish kerak.