Boshqirdistonda migrantlarni “deport” qilish kamaydi

O’tgan yil davomida Boshqirdiston sudlari Rossiyadan muhojirlarni chiqarib yuborish to’g’risidagi qarorlar sonini sezilarli darajada kamaytirdi.

Boshqirdiston Respublikasi Ichki ishlar vazirligining ma’lumotlariga ko’ra, 2025-yilda migrantlarni deportatsiya qilish to’g’risidagi qarorlar soni o’tgan yilga nisbatan 58,3% ga kamaygan.

Shu bilan birga, mintaqadagi xorijiy fuqarolar soni ham oshdi. O’tgan yili Boshqirdistonda migratsiya uchun 173 600 nafar chet ellik va fuqaroligi bo’lmagan shaxs ro’yxatdan o’tgan. Bu undan oldingi yilga nisbatan taxminan 8 foizga ko’p.

Qizig’i shundaki, migrantlar sonining ko’payishiga qaramay, qonunbuzarliklar soni kamaydi. O’tgan yil davomida politsiya xodimlari migratsiya qonunchiligining 18 704 ta buzilishini aniqladi – bu 2024 yilga nisbatan 12,7% ga kam.

Avvalroq Rossiya Tergov qo’mitasi rahbari Aleksandr Bastrikin xorijiy fuqarolar o’rtasida jinoyatchilikka qarshi kurash agentlikning ustuvor vazifalaridan biri bo’lib qolishini ta’kidlagan edi. Uning so’zlariga ko’ra, migrantlarni Moskva, Sankt-Peterburg, Tyumen va Sverdlovsk viloyatlari kabi yirik shaharlar va sanoat mintaqalari ko’proq jalb qiladi.