Ўзбекистон Буюк Британиядаги меҳнат мигрантлари сони бўйича етакчилар қаторига кирди

Британиянинг иш жойидаги қонунни  суиистеъмол қилишга қарши бошқармаси (GLAA) Қирғизистон ва Ўзбекистон ҳукуматлари билан Буюк Британияга келаётган ишчилар ҳимоясини кучайтириш бўйича муҳим келишувларни имзолади.

Ҳужжатлар томонлар ўртасидаги ўзаро ҳамкорликнинг бир қанча йўналишларини белгилаб беради, бунда Қирғизистон ва Ўзбекистондан Буюк Британияга ишчиларни жўнатиш бўйича рекрутинг агентликлари тўғрисида маълумот алмашиш асосий устувор йўналиш ҳисобланади.

2022 йилда мавсумий меҳнат визаси дастури бўйича Ўзбекистон ва Қирғизистон ишчиларига 6000 дан ортиқ визалар берилди, бу ўша йилдаги барча ишчиларнинг деярли тўртдан бир қисмини ташкил этади. Бу йил Марказий Осиёдан янада кўпроқ одамлар келиши кутилмоқда.

Имзоловчи томонлар ишга қабул қилиш жараёнида ҳам иш берувчи мамлакат, ҳам Буюк Британия қоидалари доирасида иш олиб боришини ва ўз ишчиларини эксплуатация қилиш хавфи остида қолмаслигини таъминлаш учун биргаликда ишлайди.

Қирғизистонда шартнома GLАА ва Меҳнат, ижтимоий ҳимоя ва миграция вазирлиги қошида жойлашган Фуқароларни иш билан таъминлаш маркази ўртасида тузилади.

Ўзбекистонда меморандум Буюк Британия ҳукумати номидан GLАА ва Бандлик ва қашшоқликни қисқартириш вазирлигига бўйсунувчи Ташқи меҳнат миграцияси агентлиги ўртасида тузилади.

Ҳужжат, шунингдек, томонларни қирғиз ва ўзбек ишчиларининг Буюк Британияда қонуний ишлаётган вақтларида ҳуқуқ ва манфаатларини ҳимоя қилишга мажбур қилади.

Ўзбекистон мавсумий ишчилар сони бўйича ўтган йили Украинадан кейин иккинчи, Қирғизистон эса рўйхатда тўртинчи ўринни эгаллади.

Келишувларни имзолаган GLАА Стратегия бўйича бош директори Дэррил Диксон шундай деди: “Биз 2022 йилда Ўзбекистон ва Қирғизистондан Буюк Британияга келаётган мавсумий ишчилар сони кескин ошганини кўрдик ва бизнинг ўрганиш маълумотларимизга кўра, бу рақам кейинги бир неча йил ичида кўтарилишда давом этади”.

“Заиф ишчиларни ҳимоя қилиш учун мавжуд бўлган ташкилот сифатида биз схемага кирган ҳар бир киши Буюк Британия фермер хўжаликларида ижобий тажрибага эга бўлиб кетишини ва уларнинг меҳнати учун эксплуатация қилинмаслигини таъминлашга интиламиз”, деди Диксон.

“Ушбу ҳафтада имзоланган тарихий ҳужжатлар GLАА ва Марказий Осиёдаги қимматли ҳамкорларимиз ўртасидаги мавжуд дўстона муносабатларни эътироф этади”, деб таъкидлаган Диксон.