Chernogoriya Armaniston, O‘zbekiston va Misr fuqarolari uchun vizasiz rejimni bekor qildi

Chernogoriya Vazirlar Mahkamasi Armaniston Respublikasi, O‘zbekiston Respublikasi va Misr Arab Respublikasi fuqarolari uchun vaqtincha vizasiz kirish qoidalarini bekor qildi. Bu haqda hukumatning 2025-yil 9-oktyabrda bo‘lib o‘tgan 98-sessiyasi press-relizida aytilgan. O‘zgartirishlar 2025-yil 1-noyabrdan kuchga kiradi.

Ilgari ushbu davlatlar fuqarolariga turizm va qisqa muddatli tashriflar uchun mavsumiy muddatlarga (180 kunlik muddat ichida 90 kungacha) vizasiz kirish huquqi berilgan edi. Endilikda Armaniston, O‘zbekiston va Misr fuqarolari Chernogoriyaga borish uchun konsullik yoki viza markazlari orqali viza olishlari kerak bo‘ladi.

Hukumat xabariga ko‘ra, bu qaror viza siyosatini Yevropa Ittifoqi talablariga muvofiqlashtirish doirasida qabul qilingan. Chernogoriya Yevropa Ittifoqiga kirish bo‘yicha muzokaralar olib bormoqda va migratsiya qoidalarini kuchaytirish asosiy talab hisoblanadi. Rasmiylarning ta’kidlashicha, bu Bolqon orqali noqonuniy migratsiyaning oldini olish va chegara xavfsizligini mustahkamlashga yordam beradi.

Matbuot xabarida qayd etilishicha, so‘nggi yillarda bu mamlakatlardan sayyohlar oqimi oshishi bilan birga Yevropa Ittifoqiga chegarani noqonuniy kesib o‘tishga urinish holatlari ham ko‘paygan. Chernogoriya har yili, avvalo, tranzit shubhalari tufayli 10 000 dan ortiq kirishni etadi. O‘zgarishlar Shengen mamlakatlari, Rossiya, Turkiya va Serbiya fuqarolariga ta’sir qilmaydi, ular uchun vizasiz sayohat amalda qoladi.

Bu Chernogoriya viza siyosatining birinchi qattiqlashishi emas: 2024-yilda Chernogoriya Hindiston va Xitoy fuqarolari uchun ham vizasiz kirishni bekor qilgan edi.