Chernogoriya: migrantlar janjali sababli vizasiz kirish vaqtincha to’xtatildi

Chernogoriya Turkiya fuqarolari uchun vizasiz kirishni vaqtincha to’xtatdi. Ushbu qaror Podgoritsada mahalliy aholi chet elliklar tomonidan kaltaklangan voqeadan so’ng qabul qilindi.

Hukumat 2025-yil 27-oktabrda Turkiya fuqarolari uchun vaqtinchalik viza rejimi qayta tiklanishini e’lon qildi. Bu politsiya bir kechada Turkiya va Ozarbayjondan kelgan 45 kishini chernogoriyalikni kaltaklaganlikda gumon qilib hibsga olganidan keyin sodir bo’ldi. Oxir-oqibat ikki kishi – 54 yoshli turk va 31 yoshli ozarbayjonlik hibsga olindi.

Bosh vazir Miloyko Spaich hukumat tezkor choralar ko’rishga qaror qilganini va vizasiz kirishni vaqtincha to’xtatganini aytdi.

Ushbu voqeadan so’ng poytaxtning Zabjela tumanida tartibsizliklar boshlandi: mahalliy aholi turklar turgan binoni o’rab olib, millatchilik shiorlarini aytib baqirishdi. Natijada Chernogoriya prokuraturasi millatlararo nafratni qo’zg’atish bo’yicha jinoiy ish qo’zg’atdi.

Mahalliy ommaviy axborot vositalari Podgoritsa markazida turk davlat raqamlariga ega avtomobil yoqib yuborilgani va turk fuqarosiga tegishli fast-fud restoranning oynasi sindirilgani haqida xabar berishdi.

Chernogoriya Tashqi ishlar vazirligi mamlakatga kelayotgan turk fuqarolari uchun vizalar tezlashtirilgan tartibda ko’rib chiqilishini ma’lum qildi.