Daromadingiz kam bo‘lsa, patentingiz bekor bo‘ladi

Federatsiya Kengashi chet el fuqarolari uchun Rossiyada boʻlish va ishlash qoidalarini kuchaytiruvchi yangi qonunni ma’qulladi. Endi muhojirlar oʻzlarini va qaramogʻidagi oila a’zolarini mintaqaviy koeffitsiyentni hisobga olgan holda yashash minimumidan kam boʻlmagan daromad bilan ta’minlashi shart.

Daromadlarni nazorat qilish uchun soliq xizmatlari va Ijtimoiy fond chet elliklarning ish haqi va ishi toʻgʻrisidagi barcha ma’lumotlarni toʻgʻridan-toʻgʻri IIVga yuboradi. Agar daromadingiz belgilangan minimumdan past boʻlib chiqsa, patent bekor qilinishi mumkin, Rossiyada boʻlishning ruxsat etilgan muddati esa qisqartiriladi.

Shuningdek, qonun patentlarni rasmiylashtirish va uzaytirish uchun qat’iy qoidalarni joriy etadi. Agar ma’lumotlar bazalarida daromadlaringiz toʻgʻrisida ma’lumotlar boʻlmasa yoki ish haqingiz belgilangan minimumdan past boʻlib chiqsa, patent berilmaydi va uzaytirilmaydi. Agar patentingiz bekor qilinsa yoki uzaytirish rad etilsa, siz va voyaga yetmagan farzandlaringiz 15 kun ichida Rossiyadan chiqib ketishingizga toʻgʻri keladi.

Bundan tashqari, yangi qoidalar RVP va VNJga ham tegishli. Agar ushbu hujjatlar olinganidan keyin 1 yil davomida daromadingiz belgilangan darajadan past boʻlib chiqsa, ular bekor qilinadi. Bu qoidadan istisnolar mavjud. Qonun kunduzgi ta’lim shaklida tahsil oluvchi talabalar, pensionerlar, voyaga yetmaganlar, mehnatga layoqatsiz fuqarolar va aholining ayrim boshqa toifalariga daxl qilmaydi. Shuningdek, agar siz ishingizni yoʻqotgan boʻlsangiz, lekin 3 oy ichida yangi ish topishga muvaffaq boʻlgan va zarur daromad darajasini tiklagan boʻlsangiz, hujjatlar bekor qilinmaydi.

Yangi qonunning aksariyat qoidalari 2027-yil 1-yanvardan ishlay boshlaydi. Majburiy daromad darajasiga qoʻyiladigan talablar va Rossiyada boʻlish muddatini qisqartirish mexanizmi 2027-yil 1-martdan kuchga kiradi.