“Deport” qilish uchun sabablar ko‘payishi mumkin

Davlat Dumasiga muhojirlar uchun qoidalarni sezilarli darajada kuchaytirishi mumkin bo‘lgan qonun loyihasi kiritildi. Ushbu o‘zgartirishlar Ichki ishlar vazirligining taklifiga binoan hukumat tomonidan tayyorlangan Ma’muriy huquqbuzarliklar to‘g‘risidagi kodeksga kiritilgan o‘zgartirishlarga tegishli.

Hujjatga chet elliklar Rossiyadan deportatsiya qilinishi mumkin bo‘lgan 58 ta yangi qoidabuzarlikni qo‘shish rejalashtirilgan. Izohlarda aytilishicha, asosiy maqsad rasmiylar jamoat tartibi va xavfsizligiga tahdid deb hisoblaganlarini chiqarib yuborish jarayonini tezlashtirishdir.

O‘zgartirishlar turli xil moddalarga taalluqlidir. Xususan, deportatsiya quyidagilar uchun qo‘llanilishi mumkin:
— qonunni buzgan holda mitinglar va namoyishlarda ishtirok etish;
— taqiqlangan belgilarni namoyish qilish;
— ekstremistik yoki feyk materiallarni tarqatish;
— taqiqlangan tashkilotlarni taqiqlanganligini ko‘rsatmasdan tilga olish;
— jamiyat va rasmiylarga ochiqchasiga hurmatsizlik qiladigan nashrlar;
— favqulodda holatni buzish;
— ruxsatsiz joylarda otishma qilish.

Ba’zi hollarda deportatsiyani majburiy jazo sifatida ko‘rsatish taklif qilinmoqda. Boshqalarida esa, u jarima o‘rniga yoki ma’muriy hibsga olish bilan birgalikda qo‘llanilishi mumkin.
Jamoat tartibi, xavfsizlik va «ekstremistik» xatti-harakatlar bilan bog‘liq qoidabuzarliklarga alohida e’tibor qaratilayotgani alohida ta’kidlangan.

O‘zgarishlar mitinglar, yig‘ilishlar va piketlar o‘tkazish qoidalariga ham ta’sir qiladi. Bunday qoidabuzarliklar uchun chet elliklar nafaqat jarimaga tortilishi yoki hibsga olinishi, balki mamlakatdan chiqarib yuborilishi ham mumkin.

Takroriy qoidabuzarliklar uchun deportatsiya ba’zi moddalar bo‘yicha majburiy bo‘lib qolmoqda. Biroq, istisnolar ham mavjud: masalan, Rossiya armiyasida shartnoma asosida xizmat qilgan chet elliklar uchun deportatsiya jarima yoki jamoat ishlari bilan almashtirilishi mumkin.

Ushbu tuzatishlarni tayyorlash mart oyining o‘rtalarida ma’lum bo‘ldi. 16-mart kuni loyiha qonunchilik faoliyati bo‘yicha hukumat komissiyasi tomonidan ko‘rib chiqildi.

Hozirda bu faqat qonun loyihasi va hali qabul qilinmagan.

Biroq, amaliyot shuni ko‘rsatadiki, migratsiya sohasidagi ko‘plab shunga o‘xshash tashabbuslar oxir-oqibat tasdiqlanadi. Shuning uchun bunday o‘zgarishlar jiddiy qabul qilinishi va potensial xavflarni oldindan ko‘rib chiqish kerak.