Deputat Zatulin: Migrantlarni robotlarga almashtirib bo‘lmaydi

Davlat dumasining migratsiya va fuqarolik masalalari bo‘yicha maxsus vakili, Davlat dumasining MDH ishlari bo‘yicha qo‘mitasi raisining birinchi o‘rinbosari Konstantin Zatulin Rossiyada migratsiya siyosati hali ham tartibsizlik holatida, etnik asosda manipulyasiya o‘ta xavfli bo‘lib qolayotganini aytgan.

“Ichki ishlar vaziri Vladimir Kolokolsev Federatsiya Kengashida migratsiya haqida qisqacha gapirdi, ammo bu yetarli emasligi aniq”, degan Zatulin payshanba kuni bo‘lib o‘tgan matbuot anjumanida.

🔺 Migratsiya masalasining ahamiyati

“Migratsiya “maxsus harbiy operatsiya”dan keyin ikkinchi o‘rinni egalladi”, – deydi deputat.

MDH ishlari bo‘yicha ixtisoslashtirilgan qo‘mita hozirda migratsiyaga oid 18 ta qonun loyihasini ko‘rib chiqmoqda. Biroq bu jarayon to‘xtab qoldi va Rossiyada migratsiya siyosati noaniqligicha qolmoqda.

Hatto statistik ma’lumotlar ham bahsli. 2023-yil uchun rasmiy ma’lumotlarga ko‘ra, mamlakatga 12 million 75 ming kishi kirgan. Biroq 10 million 810 ming kishi ketgan. 9 millionga yaqin odam migratsiya organlarida ro‘yxatdan o‘tgan, shundan 3 millioni patent yoki ruxsatnoma asosida ishlaydi. Ammo noqonuniy muhojirlar hamon bor – Ichki ishlar vazirligi ma’lumotlariga ko‘ra, ularning soni 650 ming, boshqa manbalarga ko‘ra – 2 milliongacha.

🔺 Migratsiyaning iqtisodiyot uchun ahamiyati

Hozirda Rossiyada 6 millionga yaqin muhojir bor. “Bu juda ko‘p”, deydi Zatulin. Pandemiyadan oldin Rossiyada 11 million xorijlik bor edi. “Biz chet el fuqarolari ko‘p davlatlar qatoriga kirdik.

Rossiyada ish yoki boshpana izlayotganlar, jumladan, Ukrainadan qochgan 2 million kishi uchun jozibador”, – deya ta’kidlagan deputat.

Zatulin iqtisodiyot migrantlarga muhtoj ekanini tan oladi: “Bizda 2,5 millionga yaqin bo‘sh ish o‘rni bor. Ammo migrantlarni robotlarga almashtirib bo‘lmaydi. Bizga o‘tish davri kerak, bu davrda migratsiya oqimi sifatini oshirish, tartibsizlik va nazoratsizlik o‘rniga MDH mamlakatlaridan mehnat resurslarini jalb qilishni tashkil etish kerak”.

🔺 Siyosat va migratsiya

Muhojirlar mavzusi uning Rossiya barqarorligiga tahdid solayotgani va demografik muvozanatni o‘zgartirayotgani haqida vahima uchun ishlatiladi. “Krokus Siti Xoll”ga qilingan hujumdan so‘ng ko‘pchilik tojiklarni tahdid deb biladi. Zatulinning ta’kidlashicha, bu yetarlicha asosga ega emas.

Migratsiya muammosini hal qilish uchun Zatulin migratsiya masalalari bo‘yicha alohida vazirlik yaratishni taklif qilmoqda. Uning ishonchi komilki, Ichki ishlar vazirligi bu vazifani bajara olmayapti: “Ichki ishlar vazirligi – bu polisiya vazirligi. Ular muhojirlar qayerda kerakligini bilishmaydi va o‘z saflaridagi korrupsiyani yenga olmaydi”.