Екатеринбургдаги тожик муҳожирлари вақтинчалик ҳибсхонадаги шароитдан шикоят қилмоқда

Екатеринбургда миграция қонунчилигини бузгани учун қўлга олинган 20 дан ортиқ тожикистонлик муҳожир чет эл фуқароларини вақтинча сақлаш маркази (ЦВСИГ)даги сақлаш шароитларидан шикоят қилган.

Муҳожирларнинг айтишича, улар 20 кун илгари ҳибсга олинган ва 2 минг рубл жаримага тортилган. Суд депортация ҳақида қарор чиқарган, аммо муҳожирлар қачон уйларига жўнатилиши номаълум.

Муҳожирларнинг сўзларига кўра, ЦВСИГда яшаш шароити ўта ёмон. Марказ ифлос, ҳожатхоналар етишмайди, таомлар бемаза. Шу сабабли баъзи муҳожирлар касал бўлиб қолишган.

“Биз ўз маблағимиз ҳисобидан ватанимизга қайтишга розимиз, лекин бизга бундай имконият берилмаяпти”, — дейди муҳожирлардан бири.

Россия расмийлари муҳожирларнинг ҳибсга олиниши ёки уларнинг қамоқда сақлаш шароитлари ҳақидаги шикоятларига изоҳ бермаяпти.

Тожикистоннинг Екатеринбургдаги консуллиги қошидаги жамоат кенгаши раисининг биринчи ўринбосари Ёқубжон Умаровнинг айтишича, мигрантлар 10 кун ичида суд қарори устидан шикоят қилиш ҳуқуқига эга. Бироқ, бу қарор қабул қилингандан сўнг дарҳол уйларига жўнатилади, дегани эмас.

Шунингдек, у жамоат кенгаши аъзолари ЦВСИГда қолаётган мигрантларга ҳуқуқий ёрдам кўрсатаётганини айтган.

Ҳар йили юзлаб тожикистонлик муҳожирлар миграция қонунчилигини бузгани учун Россиядан чиқариб юборилади. Ҳуқуқ ҳимоячилари Россияда муҳожирлар ҳуқуқлари қўпол равишда бузилаётгани ҳақида хабар мунтазам бериб боради.