Endi Rossiyaga qanday migrantlar kerakligini Ichki ishlar vazirligi hal qiladi

Davlat dumasi ikkinchi va uchinchi oʻqishda Ichki ishlar vazirligiga mehnat migrantlari uchun kasblar roʻyxatini tasdiqlash huquqini beruvchi qonunni qabul qildi. Ilgari ushbu roʻyxatni Mehnat vazirligi tuzar edi.

Yangi qonun chet el fuqarolarining huquqiy holati toʻgʻrisidagi qoidalarni, shuningdek, Rossiyadan chiqish va unga kirish tartibi toʻgʻrisidagi qonunning 256-moddasini oʻzgartiradi.

Endi aynan Ichki ishlar vazirligi chet el fuqarolari va fuqaroligi boʻlmagan shaxslarga «RVP»  va «VNJ»  guvohnomalarini olish imkonini beruvchi kasblar roʻyxatini belgilaydi.

Shuningdek, vazirlik mamlakatda vaqtincha boʻlib turgan chet elliklar qaysi hollarda oʻzlari ishga ruxsatnoma olgan hududdan tashqarida ishlashlari mumkinligini hal qiladi.

Ushbu qonun Rossiya hukumati tomonidan ishlab chiqilgan. Parlament quyi palatasiga hujjat 6-may kuni kiritilgan, 9-iyun kuni esa Davlat dumasi uni birinchi oʻqishda qabul qilgan.

2025-yil aprel oyida Mehnat vazirligi bunday kasblar roʻyxatini 203 tadan 29 tagacha sezilarli darajada qisqartirdi. Ushbu yangi roʻyxatga muhandislar, chilangarlar va dasturchilar kirdi. Shuningdek, u yerga uchuvchisiz apparatlar boʻyicha mutaxassislar hamda sanoat, astrofizika va genetika uchun katta ma’lumotlar tahlilchilari qoʻshildi.

2024-yil dekabr oyida Ichki ishlar vazirligi tashabbusi bilan talab yuqori boʻlgan mutaxassislar uchun yashash guvohnomasini tez fursatda olish imkoniyati qaytarilgan edi.