Энди Тошкент аэропортининг CIP-зали учун тўловни Телеграм-бот орқали амалга оширишингиз мумкин

Aввал ишга туширилган, халқаро ва ички парвозларни кузатиш имконини берувчи @UzairportsBot Телеграм-боти энди Тошкент аэропортининг CIP-зали учун тўловларни қабул қилади.

Телеграм-бот орқали хизматни харид қилиш учун Тошкент аэропортини, кейин жўнаб кетиш терминалини ва керакли рейсни танлашингиз керак. Шундан сўнг, бот фамилия ва исмни лотин ёзувида киритишни «сўрайди».

Хизмат ҳақини Uzcard ёки Humo банк карталари орқали тўлаш мумкин бўлади. Ҳозирча бот орқали тўлов фақат жўнаб кетаётган йўловчилар учун амал қилади. Яқин келажакда Тошкент аэропортининг CIP -залида хизматлар учун тўловни қабул қилиш функциясини кенгайтириш режалаштирилмоқда.

Шунингдек, аввалгидек, CIP -зал учун тўловни жўнаб кетишдан олдин терминал кассаларида нақд миллий валютада ёки Uzcard, Humo, Visa, Mastercard ва бошқалар орқали тўлаш мумкин.

CIP -зал хизмати парвоз учун алоҳида рўйхатдан ўтиш, бортга чиқиш учун индивидуал таклиф ва самолётга чиқиш учун алоҳида кузатиб бориш, WI-FI,  ҳожатхона ва душ, болалар хонаси, шунингдек, газаклар ва ичимликларни ўз ичига олади.

Хизмат нархи катталар учун 650 000 сўм, 2 ёшдан 12 ёшгача бўлган болалар учун 50% чегирма мавжуд, 2 ёшгача бўлган болалар учун эса бепул. Бу ҳақда Uzbekistan Airports телеграм канали маълумот берди.