Janjal nimadan chiqdi?

Kecha Leningrad oblastidagi «Sinyavinskaya» parrandachilik fermasida migrantlar o‘rtasida ommaviy janjal haqida xabar bergan edik. Bugun mojaroning yangi tafsilotlari, shuningdek, janjalning ayrim qismlari bo‘lgan video paydo bo‘ldi.

Rossiya ommaviy axborot vositalarining xabar berishicha, janjalda O‘zbekiston va Bangladeshdan kelgan ishchilar ishtirok etgan. Avvalgi xabarlarda ishtirokchilar soni taxminan 60 kishi bo‘lganligi aytilgan edi, ammo parrandachilik fermasi xodimlari bu ko‘lam ancha katta bo‘lganini da’vo qilishmoqda. Ularning taxminlariga ko‘ra, janjalda taxminan 250 kishi ishtirok etgan bo‘lishi mumkin – bir tomondan taxminan 100 kishi, ikkinchi tomondan 139 kishi.

Dastlab, migrantlar o‘rtasida ish smenasi paytida og‘zaki janjal kelib chiqqan. Guvohlarning so‘zlariga ko‘ra, tomonlar bir-birlarining tillarini tushunmaganidan haqoratlar rus tilida bo‘lgan.

Mojaro sababining norasmiy versiyasi ham ommaviy axborot vositalarida paydo bo‘ldi. Ba’zi manbalarda ishchilardan biri, Bangladesh fuqarosi, go‘yoki o‘zbekistonlik hamkasbini o‘pganligi aytilmoqda. O‘zbekning otasi buni ko‘rib qolganidan so‘ng ular o‘rtasida janjal kelib chiqqan va keyinchalik ommaviy mushtlashuvga aylangan. Bu xabarning rasmiy tasdig‘i hali yo‘q.

Mojaro keyinchalik zavod hududidagi yotoqxonada davom etdi. «Bahs va munozaralar»da tayoqlar, boltalar, bolg‘alar, toshlar va boshqa qo‘lbola buyumlar ishlatilgan.

Nashr qilingan videolarda janjalda o‘nlab odamlar ishtirok etgani ko‘rsatilgan.

Vaziyatni hal qilish uchun voqea joyiga politsiya, OMON va Rossiya Milliy gvardiyasi yetib keldi. Rasmiy ma’lumotlarga ko‘ra, janjaldan keyin 20 kishi kasalxonaga yotqizilgan. Ulardan yetti nafari og‘ir ahvolda.

Rossiya polisiyasi hozirda tergov olib bormoqda va ommaviy janjalning barcha holatlarini aniqlamoqda.