«КАМАЗ» Ўзбекистондан меҳнат муҳожирларини жалб этмоқда – Рустам Минниханов

Татаристон Республиаси Раиси Рустам Минниханов минтақадаги муҳожирлар билан муносабатларга баҳо берди. Унинг сўзларига кўра, айни пайтда республикада 35,7 минг мигрант меҳнат қилмоқда, бу иш билан банд аҳолининг 1,7 фоизини ташкил этади. Одатда, хорижликлар қурилиш, савдо, умумий овқатланиш ва транспорт каби соҳаларда ишлашни афзал кўрадилар.

Миннихановнинг қайд этишича, Татаристонда меҳнат миграциясини ривожлантиришга қаратилган қатор дастурлар мавжуд. Хусусан, “КАМАЗ” компанияси Ўзбекистонда меҳнат муҳожирларини уюшган ҳолда жалб этишни амалга оширмоқда, “Алабуга” махсус иқтисодий зонасида Россияга расмий ишга жойлаштириш ва бепул етиб келиш, ётоқхонада имтиёзли яшаш, тиббий суғурта, мигрантлар учун патент ёки иш визасини рўйхатдан ўтказиш лойиҳаси кўриб чиқилмоқда.

Бундан ташқари, Татаристонда қарийб 26 минг хорижлик, жумладан, 22 минг 658 нафари университетларда, 2 минг 834 нафари мактабларда, 261 нафари болалар боғчаларида таҳсил олади. Татаристонда хорижлик талабаларни мослаштириш режаси ҳам мавжуд.

Миннихановнинг таъкидлашича, Татаристондаги муҳожирлар билан алоқалар конструктивдир. У хорижий фуқаролар билан ҳамкорлик минтақа иқтисодиёти ва ижтимоий соҳасини янада ривожлантиришга хизмат қилишига ишонч билдирди.

Татаристон ва Ўзбекистон ўртасидаги алоқалар тарихий, миллий ва диний-маърифий аҳамияти катта.

Умуман олганда, Россия президенти Путиннинг туркий дунёда норасмий вакили деб танилган Татаристон Раиси Рустам Минниханов учун Ўзбекистон билан алоқалар ўзига хос хусусиятга эга. Унинг 2022 йил октябр ойидан бери Ўзбекистонга 3 марта ташриф буюрганини айтиш кифоя.