Краснодарда чуқурнинг «нотўғри» қазилгани қотилликка сабаб бўлди

Унинг ҳамкасби жароҳат олиб касалхонага ётқизилган.

Кеча кечқурун соат ўнларда номаълум шахс Боннская кўчасида жойлашган “Сокол” қурилиш компанияси ходимларининг вагончасига бостириб кириб, уларга чуқур ҳақида гапириб, бақира бошлаган. Унинг фикрича, ишчилар чуқурни нотўғри ва бошқа жойда қазишган экан. Жанжал чоғида у қуролини олиб, икки кишини отиб, қочиб кетган.

Натижада 61 ёшли ишчи бошидан ўқ еб, вафот этган. Яна бир жабрланувчи – 52 ёшли шериги оёғига ўқ тегиб, тирик қолган ва касалхонага ётқизилган. Иккаласи ҳам РФ фуқаролари. Жабрланувчи қотилни танимаслигини айтган.

Жиноят жойига етиб келган полиция у ердан 12 калибрли патрон ва гилзалар топган. Жиноятчи ҳозир бутун шаҳар бўйлаб қидирилмоқда.