«Krokus»dagi terakt Rossiya va Tojikiston munosabatlariga ta’sir qiladimi?

Vladimir Putin o‘z bayonotida terrorchilarning “fuqaroligi yo‘q va bo‘lishi ham mumkin emas”ligini ta’kidlab, hibsga olinganlar Tojikiston fuqarolari ekani haqidagi xabarga aniq munosabat bildirdi. Bundan Rossiya o’zining kam sonli ittifoqchilaridan biriga qarshi har qanday sanktsiyalarni kiritish ehtimoli juda pastligini taxmin qilish mumkin. Tojikiston prezidenti Imomali Rahmon allaqachon Putin bilan vaziyatni muhokama qilib, qo‘lga olinganlar o‘z mamlakati fuqarolari ekanidan afsusda ekanini bildirdi hamda ularning na vatani, na dini yo‘qligini qo‘shimcha qildi.

Putin, shuningdek, terrorchilarning Ukraina bilan ehtimoliy aloqasini tilga oldi va ularni natsistlarga qiyosladi, qo‘lga olinganlar shunchaki “Rossiya dushmanlari” qoʻlidagi qo‘g‘irchoq boʻlishi mumkinligiga ishora qildi. Shunday ekan, “Krokus” terakti Rossiya tashqi siyosatiga ta’sir etsa, bu katta ehtimol bilan Markaziy Osiyoga emas, balki Ukraina bilan bog‘liq bo‘ladi.

Rossiya va Tojikiston oʻrtasidagi munosabatlar mustahkamligicha qolmoqda. Har ikki davlat rahbarlari oʻzlarining razvedka idoralari yaqindan hamkorlik qilishiga vaʼda berishdi, vaholanki, barcha mumkin boʻlgan sohalarda ham ikki tomonlama, ham koʻp tomonlama formatlarda sezilarli hamkorlik mavjud. Biroq, bunday hamkorlikning samaradorligi masalasi ochiqligicha qolmoqda. U terroristik xurujlarning oldini olishga qodirmi yoki u faqat rangli inqiloblar va har ikki davlatdagi avtoritar rejimlarni saqlab qolish kabi soxta tahdidlarga qarshi kurashga qaratilganmi?