“Medosmotr”ning yangi qoidalari sentyabr oyida kuchga kiradi

Rossiya migrantlarning tibbiy ko‘riklari haqidagi ma’lumotlarni uzatish qoidalarini o‘zgartirdi. Yangi hukumat qarori 2026-yil 15-mayda imzolangan.

Ilgari klinikalar xorijiy fuqaroning sog‘lig‘i haqidagi ma’lumotlarni test natijalarini olgandan keyin bir ish kuni ichida Ichki ishlar vazirligiga yuborar edilar. Endi esa muddat qisqartirildi.

Yangi qoidalarga ko‘ra, tibbiyot muassasalari tibbiy ko‘rik natijalari olinganidan keyin bir ish kuni ichida Ichki ishlar vazirligining elektron tizimiga ma’lumotlarni uzatishlari shart.

Yangi talablar rasman 2026-yil 1-sentyabrdan kuchga kiradi.

Hozirda Rossiyada taxminan 6,5 million xorijiy fuqaro bor. Faqat 2025-yilda 3 milliondan ortiq odam tibbiy ko‘rikdan o‘tgan.

Rossiya rasmiylarining ma’lumotlariga ko‘ra, 15 000 nafar chet el fuqarosiga xavfli yuqumli kasalliklar tashxisi qo‘yilgan. Ulardan taxminan 2500 nafariga OIV tashxisi qo‘yilgan, yana 400 nafarida giyohvand moddalar iste’mol qilgani aniqlangan.

Endi Sog‘liqni saqlash vazirligi tizimidagi ma’lumotlar Ichki ishlar vazirligi ma’lumotlar bazalariga ancha tezroq o‘tkaziladi. Rossiyada migrantlar uchun tibbiy ko‘rik o‘rtacha 5000 dan 7000 rublgacha turadi. Tekshiruvdan o‘tgandan so‘ng, chet elliklarga QR kodli elektron hujjat beriladi. U 12 oy davomida amal qiladi.

Rossiya rasmiylari barchaga amaldagi tibbiy hujjatlarning yo‘qligi Rossiya Federatsiyasi Ma’muriy huquqbuzarliklar kodeksining 18.11-moddasi bo‘yicha jazolanishini eslatmoqda.

Qoidabuzarlar 2000 dan 4000 rublgacha jarimaga tortilishi, shuningdek, mamlakatdan chiqarib yuborilishi (vidvoreniye) yoki deportatsiya qilinishi mumkin.

Ichki ishlar vazirligi ma’lumotlariga ko‘ra, 2026-yil boshidan beri turli qonunbuzarliklar uchun 120 000 xorijiy fuqaroning Rossiyaga kirishi taqiqlangan.