Migrant bolalar haqidagi ma’lumotlar Ichki ishlar vazirligiga o’tkazilishi haqidagi qonun qabul qilindi

Rossiyada ta’lim muassasalaridagi migrant bolalar haqidagi ma’lumotlarni Ichki ishlar vazirligiga berish imkonini beruvchi yangi qonun qabul qilindi. Davlat Dumasi ushbu hujjatni ikkinchi va uchinchi o’qishda yalpi majlisda ma’qulladi.

Gap Rossiyada yashovchi chet el fuqarolarining farzandlari haqida bormoqda. Yangi qonunga ko’ra, ham mintaqaviy, ham mahalliy ta’lim organlari bunday bolalar haqidagi ma’lumotlarni Ichki ishlar vazirligiga o’tkazadi. Bu voyaga yetmagan muhojirlarni o’z vaqtida aniqlash va ularning Rossiya jamiyatiga moslashishi va integratsiyalashuviga yordam berish uchun amalga oshiriladi.

Qanday ma’lumotlar uzatiladi:
bolaning va uning ota-onasining shaxsiy ma’lumotlari;
test natijalari (masalan, rus tilida);
maktabga qabul qilish yoki o’qishdan chiqarish to’g’risidagi ma’lumotlar;
nazorat ostidagi migrant ota-onalarning maktabga murojaatlari haqida ma’lumot.

Davlat Dumasi raisi Vyacheslav Volodinning ta’kidlashicha, bunday ma’lumotlar almashinuvi bolalar va ularning ota-onalari Rossiyada qonuniy bo‘lishini tekshirishga yordam beradi. Bu, uning so‘zlariga ko‘ra, to‘g‘ri qaror qabul qilishga, voyaga yetmaganlarni noqonuniy faoliyatda ishtirok etishdan va boshqa xavf-xatarlardan himoya qilishga ko‘mak beradi.

Qonun shuningdek, barcha xorijiy fuqarolar uchun rus tili bo’yicha test natijalari federal axborot tizimiga kiritilishini nazarda tutadi. Bu nazoratni kuchaytirishi va migrantlarni ro‘yxatga olishni yanada shaffof va samaraliroq qilishi kerak.

Bundan tashqari, Volodin yaqinda migrant bolalarni rus tilini bilmasdan va ularning mamlakatda bo‘lish qonuniyligini tekshirmasdan maktablarga qabul qilishni taqiqlash to‘g‘risida yana bir qonun qabul qilinganini eslatgan.

Uning ma’lum qilishicha, ushbu qoidalar joriy etilgandan so’ng barcha hujjat topshirganlarning atigi 4 foizi maktablarga qabul qilingan. Masalan, 22-may holatiga ko‘ra, test sinovlari uchun ariza topshirgan 2868 nafar fuqarodan bor-yo‘g‘i 498 nafari, ya’ni 17 foizi imtihonga kiritildi.