MIGRANT NEWS – МИГРАНТЛАР УЧУН ҲАФТА ЯНГИЛИКЛАРИ

Ҳафта воқеалари – Migrant нигоҳида

Migrant.mobi сайти ҳафтанинг муҳим воқеаларига доир Migrant.news дайжестини эътиборингизга ҳавола қилади.

Унда Путиннинг мигрантлар хусусида топшириғи, Тергов қўмитасининг янги баёнотига тўхталамиз. Бундан ташқари, Россиянинг турли минтақаларида ўтказилган рейдлар хусусида гаплашамиз. Дастуримиз давомида Москва метросида полициячиларни дўппослаган мигрантлар тақдири нима бўлади, деган саволга ҳам жавоб топасиз.

Якунланиб бораётган ҳафтада Россиянинг турли минтақаларида қайси соҳаларда патентли мигрантлар ишлаши тақиқланганига доир таҳлилий мақола эълон қилдик. У билан қуйидаги ҳаволада танишишингиз мумкин.

1. Якунланаётган ҳафтанинг миграция соҳасидаги муҳим воқеа Владимир Путиннинг Ички ишлар вазирлигига берган топшириғи бўлди. Россия раҳбари мамлакат қонунчилиги ва қоидаларини беҳурмат қилган мигрантларга кескин чоралар кўриш керак, деган фикрларни билдирди. Шу билан бирга, Ички ишлар вазирлигини экстремизм билан шуғулланган ноқонуний мигрантларга нисбатан қатъийроқ ва кескинроқ чоралар кўриш кераклигини таъкидлади.

“Ноқонуний мигрантлар ва Россия қонунини бузганларга нисбатан энг қатъий чоралар кўрилиши, Россиядан бадарға қилиш ва мамлакат ҳудудига киришни тақиқлаш шулар жумласидан. Экстремизмнинг ҳар қандай кўриниши, тартиб-таомилларни бузиш ва ноқонуний меҳнат фаолияти билан шуғулланиш тезкор қарорлар қабул қилишга асос бўлади. Ноқонуний миграция негизида ўзининг жиноий бизнесини қурадиганлар учун ҳам кескин оқибатлар бўлиши керак”, – деган Владимир Путин.

2. Бу ҳафтада тожикистонлик мигрантларни хурсанд қиладиган 2та маълумот хабар қилинди. Маълум қилинишича, “запретдаги” 120 минг тожикистонликка Россия ҳукумати амнистия актини қўллаган. Ушбу хабар Путиннинг қонунбузар мигрантларни мамлакатдан зудлик билан чиқариб юборишга доир тавсиялари билан деярли бир вақтда тарқалди.

Migrant.mobi асосчиси ва юристи Ботир Шермуҳаммаднинг айтишича, бу хабарнинг “янгилик деган жойи йўқ”. Чунки, Россия ҳукумати “запрет”га тушган тожикистонликларга амнистия актини 2021 йил 8 сентябрдаёқ қўллаган эди. Аслида, Россия ҳукумати 2021 йил 18 августда “запрет”га тушган ўзбекистоникларга ҳам амнистия актини қўллаган. Аммо, негадир, бу хабар кенг ёритилмаган ва ОАВ эътиборидан четда қолган.

Тожикистон вазирига кўра, амнистияга “илинмаганлар” ҳам бор бўлиб, Россия судлари томонидан кириш тақиқланган тожикистонликлардан “запрет” олиб ташланмаган.

3. Ўтиб бораётган ҳафтада тожикистонлик қўшниларимизни хурсанд қиладиган яна бир хабар пайдо бўлди. Гап шундаки, Тожикистон фуқаролари кексайганларида Россия пенсиясини олиш учун ариза топширишлари мумкин бўлди.

Тожикистон ижтимоий суғурта ва пенсия агентлиги директори Дилмурод Давлатзодага кўра, 2021 йил сентябрида икки давлат президентлари ушбу масаланинг ҳуқуқий жиҳатларига доир шартномани имзолаган. Аммо, бу Россияда ишлаётган тожикистонлик меҳнат мигрантининг ҳар бири нафақага чиққанида Россия пенсиясини олишини англатмайди.

4. Калуга области губернатори Владислав Шапша феврал ойи бошларида мигрантлар хусусида кескин чиқишлар қилиши ортида областда рейд ўтказилди. Унда 60 дан ортиқ мигрант ушланиб, 5 киши мамлакатдан «депортация» ҳам қилинган. «Цунами» деб номланган оператив-профилактик тадбир натижасида 37 нафар мигрантга маъмурий баённомалар тузилган.

5. Мигрантлар билан боғлиқ рейдлар Санкт-Петербургда ҳам ўтказилди. Бу ерда ноқонуний рўйхатга қўйишда гумонланувчилар қўлга олинди. 5 кишидан иборат уюшган гуруҳ Петербургда 14 мингдан ортиқ хорижликларни миграция рўйхатига ноқонуний қайд қилишда гумон қилинмоқда.

“Жиноий бизнес 2018 йил май ойидан буён фаолият кўрсатиб келган… Тергов маълумотларига кўра, гумонланувчиларнинг жиноий хизматларидан 14 мингдан ортиқ хорижий фуқаро фойдаланган”, – деган ИИВ матбуот котиби Ирина Волк.

6. Рейд мавзуси Самара вилоятида ҳам давом этди. Бу ерда 450га яқин мигрантни ноқонуний равишда ишга жойлаган жиноий гуруҳ устидан иш очилгани хабар қилинди. Айни вақтда иш судда кўрилмоқда. Жиноят судда исботини топадиган бўлса, судланувчилар 7 йилгача озодликдан маҳрум қилиниши мумкин.

7. 18 феврал куни Москвада полициячиларни дўппослаган мигрантлар ушлангани ҳақида хабарлар пайдо бўлди. Полиция ходими Москва метросининг “Тульская” бекатида ҳужжат текшириш чоғида ўртаосиёлик мигрант қаршилигига дуч келган. Унинг дўсти полиция ходимларига нисбатан тажовузкорона ҳаракат қилган. Айни вақтда тергов ҳаракатлари олиб борилмоқда. Улар 5 йилгача озодликдан маҳрум қилиниши мумкин.

8. Ўтиб бораётган ҳафтада Россия Тергов қўмитаси мигрантлар орасида жиноятчилик ошмоқда, деган асоссиз ва ёлғон фикрини жамоатчиликка сингдиришда давом этди. Тергов қўмитаси сайтида жойланган мана бу хабар ҳам фикримизни исботлайди. Ваҳоланки, Россия ИИВ расмий статистикасида МДҲ мамлакатларидан келган мигрантлар орасидаги жиноятчилик кўлами 2021 йилда 2020 йилга нисбатан 7,5 фоизга пасайгани хабар қилинган эди.

Бу борада бизнинг айтадиган гапимиз шу: бўлди-да энди, жаноб Бастрикин, қачонгача, уйингизда бўлаётган ишларга мигрантларни айблайсизлар! Бўлмаса, орқа сана билан бўлса-да, статистикани ўзгартириб қўйинглар!

Ўтган ҳафта, фақат “ушла-ушла”, “қама-қама” каби рейдларга ёхуд мигрантларни айблаш баёнотларига бой бўлмади. Дайжестимизда мигрантлар учун хушхабарларимиз ҳам бор.

9. Ва ниҳоят. Дайжестимизнинг сўнгги хабари Марат Хуснуллиннинг Давлат думасида қилган баёнотида ҳақида. Хуснуллин Россияда уй-жой ва умуман қурилиш соҳасидаги муаммоларга тўхталган чиқишида мигрантлар мавзусида ҳам ўз қарашларини билдирган.

“Россиядаги мигрантлар маҳаллий аҳолига нисбатан 50 фоизга кўпроқ ишлайди, аммо 30 фоизга камроқ ҳақ олади”, – деган Хуснуллин. У хорижий фуқароларни қурилиш соҳасига кенгроқ жалб қилиш таклифини билдирар экан, ушбу соҳани тартибга солувчи қонунчилик талабларини кучайтириш зарурлигига урғу берган.