Migrant sudda yutib chiqdi

Salexardda 33 yoshli muhojir Muzaffar Mirzaboyev ish vaqtida olgan jiddiy jarohati uchun 750 000 rubl miqdorida kompensatsiya oldi. Qurilayotgan bolalar bog‘chasining tomini tozalash paytida u sakkiz metr chuqurlikdagi shaxtaga tushib, mayib bo‘lgan edi.

Mirzaboyev «Noviy Proyekt» kompaniyasida yo‘l ishchisi bo‘lib ishlagan. 2026-yil mart oyida unga Obdorskiy mikrorayonida qurilayotgan bolalar bog‘chasining tomidan qorni tozalash vazifasi yuklatilgan.

Uning so‘zlariga ko‘ra, tomda yotgan taxta ish paytida unga xalaqit qilgan. Uni olib tashlashga uringanida, sakkiz metr chuqurlikdagi shaxtaga tushib ketgan. U hushini yo‘qotgan va kasalxonada o‘ziga kelgan.

Yiqilish natijasida Mirzaboyev bosh miya jarohati, miya chayqalishi va qovurg‘alarini singan ekan. Unga nogironlik nafaqasi berilmagan, ammo hozirda jismoniy mehnat taqiqlangan. Erkakka 2027-yil yanvarigacha og‘ir narsalarni ko‘tarish taqiqlangan.

Sudda muhojir ish haqi masalalari haqida ham gapirib, ishga qabul qilinganida oyiga 100 000 dan 120 000 rublgacha va’da qilinganini da’vo qildi. U kompaniyada 2025-yil dekabridan beri ishlaydi, ammo maoshini faqat bir marta — qishda olganini aytgan.

Jarohatdan so‘ng, erkak to‘liq ishlay olmagan. Mirzaboyev «Noviy Proyekt» va «ProyektStroyServis» kompaniyalaridan ma’naviy zarar uchun 1,5 million rubl miqdorida kompensatsiya talab qildi.

Kompaniyalar vakillari bundan norozi bo‘lib, «Noviy Proyekt» faqatgina 150 000 rubl to‘lashga tayyor. «ProyektStroyServis» 100 000 rublgacha kompensatsiya taklif qildi. Kompaniya shuningdek, baxtsiz hodisadan keyin ishchining bepul yotoqxonada yashash joyi saqlanib qolganini va uni oziq-ovqat bilan ta’minlaganini iddao qilgan. Hodisadan keyin tuzilgan komissiya baxtsiz hodisa ishning yomon tashkil etilishi natijasida yuzaga kelganini aniqladi. Xususan, ish jarayoni va mehnat intizomi ustidan tegishli nazorat yo‘qligi, shuningdek, ishchilar xavfsizligi bo‘yicha o‘qitishdagi kamchiliklar ham aniqlandi.

Sud Mirzaboyevga ma’naviy zarar uchun 750 000 rubl miqdorida kompensatsiya to‘lashni buyurdi. Shundan «Noviy Proyekt» 150 000 rubl, «Proyektstroyservis» esa yana 600 000 rubl to‘lashi kerak. Mas’ul mansabdor shaxslar intizomiy jazoga tortildi.

Bu ish boshqa migrant ishchilar uchun ham muhimdir: agar ish beruvchi yoki xavfsizlik uchun mas’ul tashkilot yetarli ish sharoitlarini ta’minlamagan bo‘lsa, xorijiy fuqaro ishlab chiqarishdagi jarohat uchun kompensatsiya talab qilish huquqiga ega.