Migrantlar nazorat ostidagi shaxslar reyestriga noto’g’ri kiritilganidan shikoyat qilmoqda

2025-yil 5-fevraldan boshlab Rossiyada mamlakatda noqonuniy bo‘lgan chet el fuqarolarini hisobga olish uchun mo‘ljallangan nazorat ostidagi shaxslar reyestri faoliyat yuritmoqda. Ushbu reyestrga kiritilishi yashash joyini ruxsatsiz o‘zgartirish, yashash joyidan chiqib ketish, ko‘chmas mulk va avtomashinalar sotib olish, turmush qurish, banklarda hisob raqamlarini ochish, bolalarni ta’lim muassasalariga joylashtirishni taqiqlash kabi bir qator cheklovlarni nazarda tutadi.

Biroq, reyestr ishga tushirilganining ertasigayoq Rossiyada qonuniy yashash uchun barcha zarur hujjatlarga ega bo‘lgan ayrim chet el fuqarolari adashib ushbu ro‘yxatga kiritilgani haqida xabarlar paydo bo‘ldi. Natijada ular bank hisoblarini bloklash va boshqa cheklovlarga duch kelishdi.

Masalan, ikki yildan buyon Rossiyada rasmiy ish va propiska bilan yashab kelayotgan Mehrojbek H. nazorat ostidagi shaxslar reyestriga kiritilganini aniqladi. Shu sababli, u o‘zining bank hisobvarag‘idan to‘liq foydalana olmaydi va pul mablag‘larini olishda cheklanadi.

Rossiya Ichki ishlar vazirligi reyestrni yaratish va undan foydalanish tartibini tushuntirib berdi, shuningdek, fuqarolar va yuridik shaxslarga boshqarmaning rasmiy veb-sayti yoki Davlat va munisipal xizmatlarning yagona portali (ЕПГУ) orqali reyestrda chet el fuqarosi haqidagi ma’lumotlar mavjudligini tekshirish imkoniyatini taqdim etdi.

Yuzaga kelgan muammolar yuzasidan reyestrga xato kiritilishiga duch kelgan chet el fuqarolarining huquqiy holatini tartibga solish va cheklovlarni bartaraf etish uchun tegishli organlarga murojaat qilish tavsiya etiladi.