Мигрантларни савдога ноқонуний жалб қилган ижара берувчилар жавобгарликка тортилади

Федерация Кенгаши Россия Федерациясининг Маъмурий Кодексига хорижликларни савдо объектларига ёллашда миграция қонунчилигини бузиш тўғрисидаги ўзгартиришларни маъқуллади.

Асосий ўзгартиришлар ижарачи томонидан қонунни бузганлик учун ижарага берувчиларнинг жавобгарлигини белгилашга тегишли. Ўзгартиришлар ижарага берувчиларни икки гуруҳга бўлди: чакана савдо бозорлари эгалари ёки менежерлари ва бошқа савдо объектларнинг эгалари ёки раҳбарлари.

Гап шундаки, чакана савдо бозорида ижарага берувчи, амалдаги қонунчиликка мувофиқ, ижарачидан ўз ходимларининг Россия Федерацияси ҳудудида яшаш ва ишлаш учун рухсатномалар мавжудлигини тасдиқлашни талаб қилиш ҳуқуқига эга. Бошқа жойлардаги ижарага берувчилар бундай ҳуқуққа эга эмас, шунинг учун ижарачилар қонунни бузган тақдирда улар жавобгарликка тортилмайди.

Чакана савдо бозорларида тегишли ҳужжатларсиз чет эллик ишчиларни ёллаш учун жисмоний шахслар 3000 дан 4000 рублгача жаримага тортилади. Москва, Санкт-Петербург ва вилоятларда – 5 минг рублгача. Мансабдор шахслар 50 минг рублгача, якка тартибдаги тадбиркорлар ва юридик шахслар 800 минг рублгача жаримага тортилади ёки уларнинг фаолияти 90 кунгача маъмурий тўхтатилади.

“Чакана бозорлар тўғрисида”ги қонун ва Меҳнат кодексига ҳам ўзгартиришлар киритилади.

Аввалроқ, Давлат Думасида ушбу тузатишларни қабул қилиш жараёни ҳақида айтилган, унда дастлаб якка тартибдаги тадбиркорларни ушбу иш бўйича жавобгар шахслардан чиқариб ташлаш режалаштирилган эди. Аммо охир-оқибат, бундай жавобгарлик барибир мустаҳкамланди.