Migrantning oʻquvchi qizga hujum qilgani yolgʻon ekan

Tver viloyatining ijtimoiy tarmoqlarida migrantning maktab oʻquvchisi boʻlgan qizga hujum qilgani haqida xabarlar tarqalgan edi. Anonim xabarlar Kuvshinov, Kimri, Rjev, Bejetskiy, Nelidov va boshqa okruglarning guruhlarida paydo boʻldi.

Xabarlarda qandaydir muhojir erkak bir o‘quvchi qizning telefonini olib, uning raqamini olish uchun yashirincha oʻziga qoʻngʻiroq qilgani, keyin esa unga shilqimlik qilgani aytilgan.

Tver viloyati boʻyicha IIV boshqarmasi ushbu ma’lumotni rasman rad etdi. Tasvirlangan holat bu viloyatga aloqador emas. Aslida ushbu voqea 1-avgust kuni Vladivostok shahrida sodir boʻlgan.

Ekspertlar bunday xabarlar rejalashtirilgan provokatsiya ekanligini aytadi. Ushbu nashrlardan maqsad — oʻquvchilarda muhojirlarga nisbatan nafrat uygʻotish va millatlararo nizolarni keltirib chiqarishdir. Bunga oʻxshash qolipli matnlar Rossiyaning oʻnlab boshqa hududlarida yuzlab marta paydo boʻlgan. Bunday xabarlarda odamlarni chalgʻitish uchun voqeaning aniq manzili va sanasi ataylab koʻrsatilmaydi.

Politsiya fuqarolardan faqat tekshirilgan ma’lumot manbalariga ishonishni va anonim guruhlardagi nashrlarga tanqidiy yondashishni soʻraydi. Yolgʻon tarqalishiga yordam bermaslik uchun shubhali xabarlarni tanishlarga yubormaslik kerak.

Rossiyada ishonchsiz yangiliklarni nashr etganlik uchun qat’iy javobgarlik nazarda tutilgan. Feyklarni qasddan tarqatganlik uchun fuqarolar uchun u 30 000 rubl, yuridik shaxslar uchun esa 500 000 rublgacha ma’muriy jarima solinishi mumkin. Shuningdek, buning uchun RF JK 207.1 moddasi boʻyicha jinoiy javobgarlikka tortilish ham  mumkin, unda 300 000 dan 700 000 rublgacha jarima yoki 3 yilgacha muddatga ozodlikni cheklash nazarda tutilgan.