Migratsiya boʻlimining rahbari pora olgani uchun 8 yilga qamaldi

Kopeysk shahri migratsiya boʻlimining sobiq boshligʻi Anastasiya Litvinova chet el fuqarolaridan pora olgani uchun sakkiz yil koloniyaga hukm qilindi. Sudda uning migrantlarga pul evaziga hujjatlarni tez rasmiylashtirishda yordam bergani isbotlandi. Gumondor 11 ta jinoyat epizodi boʻyicha aybdor deb topildi. Sud jazoni uning oʻgʻli 14 yoshga toʻlguniga qadar, ya’ni 2033-yil 12-avgustgacha kechiktirishga qaror qildi. Shuningdek, Litvinovaga 700 ming rubl miqdorida jarima belgilandi, u polkovnik unvonidan mahrum qilindi va uch yarim yil davomida ichki ishlar organlarida ishlashi taqiqlandi.

Sobiq amaldor ayol bilan birga Saydaxmat Mamurov va Mirzomurod Rabiyevlar ham sudlandi. Ular noqonuniy migratsiyani tashkil etishda aybdor deb topildi. Saydaxmat Mamurov ikki yarim yil umumiy tartibli koloniya va 200 ming rubl jarima oldi. Mirzomurod Rabiyev uch yil umumiy tartibli koloniya va 250 ming rubl jarima oldi. Ikkala erkak ham sud zalining oʻzidayoq hibsga olindi.

Dastlab Litvinova 2023-yil avgustdan sentyabrgacha boʻlgan davrda 15 ming rubl miqdoridagi pora bilan qoʻlga tushgan edi. Uni Federal xavfsizlik xizmati va Ichki ishlar vazirligining oʻz xavfsizligi xizmati xodimlari ushladi. Avvaliga ishda faqat bitta epizod bor edi, ammo tergov davomida ularning soni ortib bordi. Yakunda Litvinova Rossiya Federatsiyasi Jinoyat kodeksining bir nechta moddalari boʻyicha aybdor deb topildi. Sud uni pora olganlik, noqonuniy migratsiyani tashkil etganlik, RF fuqarosi pasportini noqonuniy berganlik, mansab vakolatlarini suiiste’mol qilganlik va mansab vakolatlaridan chetga chiqqanlik boʻyicha ayblamoqda. Hukm hali qonuniy kuchga kirmagan va uning ustidan shikoyat qilinishi mumkin. Litvinova qoʻlga olinganidan keyin bosh boshqarmada tekshiruv oʻtkazildi. U ichki ishlar organlaridan boʻshatildi, uning rahbarlari esa intizomiy javobgarlikka tortiladi.