Moskva muhojirlarga yodgorlik o‘rnatmoqchi edi, biroq…

Moskvada mehnat muhojiriga haykal o‘rnatish g‘oyasi muhokama qilindi. Bu haqda Mehnat migrantlari kasaba uyushmasi raisi Renat Karimov ma’lum qildi. Uning fikricha, bunday yodgorlik xalqlar o‘rtasidagi do‘stlik va Rossiyaning ko‘p millatliligi ramziga aylanadi.

«Agar muhojirga haykal o‘rnatishsa, bu turli davlatlarda turli odamlar yashashini ko‘rsatardi. Balki bu hammaga ham yoqmasligi mumkin, lekin men bu fikrni qo‘llab-quvvatlayman. Bu yaxshi ramz bo‘lardi», degan Karimov “Abzats” nashriga bergan intervyusida.

Yodgorlik sobiq GES-2 elektr stansiyasi binosi ro‘parasida, avvallari “Katta loy №4” haykali turgan joyda o‘rnatilishi rejalashtirilgan edi. 2021-yildan beri o‘sha joyda turgan bu g‘alati alyuminiy figura Moskva aholisiga yoqmadi – ko‘pchilik uni axlatga o‘xshatdi.

Avvaliga ular haykalni 9 oy turishini rejalashtirishgan edi. Ammo 2022-yil avgust oyida V-A-C jamg‘armasi haykal noma’lum muddatgacha qolishini e’lon qilgan edi. Hozir u olib tashlangan va joy bo‘shab qolgan.

Karimovning taklifidan keyin internetda Moskva markazida muhojir haykali albatta o‘rnatiladi, degan mish-mishlar paydo bo‘ldi. Ammo keyinroq Karimovning o‘zi ham buni rad etdi. U:
«Migrantlar Rossiya rivojiga katta hissa qo‘shmoqda. Ular filmlar, kitoblar yoki hatto yodgorlik orqali tan olinishga loyiq. Lekin hozir eng qulay payt emas. Jamiyat ikkiga bo‘lingan – kimdir muhojirlarni mamlakatning bir qismi deb, boshqalar muammo deb biladi. Hozir xalqni birlashtirish muhim, ularni ajratish emas».

Taniqli aktyor va deputat Nikolay Burlyayev ham o‘z fikrlarini bildirdi. U muhojirlar yodgorligiga qarshi:

«Rossiyada 190 dan ortiq millat vakillari istiqomat qiladi. Lekin bular shu yerda tug‘ilib, yashaydiganlardir. Muhojirlarga alohida yodgorlik o‘rnatmasdan, yurtimiz sharafini ulug‘laganlarni abadiylashtirish yaxshiroqdir», – degan u «Abzats» nashriga bergan intervyusida.