Москвада аксилтеррор амалиёти ва чекловлар бекор қилинди

Москвада аксилтеррор операцияси режими билан боғлиқ барча чекловлар бекор қилинмоқда. Бу ҳақда душанба куни пойтахт мери Сергей Собянин маълум қилди.

“Биз аксилтеррор операцияси режимини жорий этиш билан боғлиқ барча чекловларни олиб ташлаймиз”, — деб ёзган Собянин.

Унинг қўшимча қилишича, 1 июль куни пойтахт мактаб ўқувчилари учун шаҳар миқёсидаги битирув байрами бўлиб ўтади. “Яна бир бор москваликларга уларнинг хотиржамлиги ва тушунгани учун миннатдорчилик билдираман”, — дея хулоса қилди мэр.

24 июнь куни Москва, Москва вилояти ва Воронеж вилоятида КТО режими жорий этилган эди. Айрим жойларда транспорт ҳаракати тўсиб қўйилган, Москва аҳолиси ва меҳмонларидан имкон қадар шаҳар бўйлаб ҳаракатланишдан воз кечиш сўралганди. Пойтахтда аввал эълон қилинган барча оммавий тадбирлар бекор қилинди.

Ўшанда Собянин москваликларни хотиржамликка ва расмий манбаларга ишонишга чақирганди. Шаҳарда аксилтеррор тадбирлари ўтказилиб, йўлларда қўшимча назорат ўрнатилди. Москва вилоятида ҳам худди шундай чора-тадбирлар ҳақида вилоят губернатори Андрей Воробёв маълум қилган эди.

Тадбир давомида Транспорт департаменти Москвадан жанубга юрадиган минтақалараро автобуслар кечиктирилиши ва бекор қилиниши мумкинлигини маълум қилди. Бундан ташқари, Москва дарёси бўйлаб кемаларнинг ҳаракати тўхтатилди, дарё қирғоқларининг иши чекланди.