Moskvada iftorlik uyushtirildi

Muqaddas Ramazon oyida Moskvada Rossiyada ishlayotgan o’zbekistonliklar uchun iftorlik uyushtirildi. Tadbir O’zbekistonning Rossiyadagi elchixonasi diplomatlari tomonidan tashkil etildi.

Iftorlik «Antek» MChJ qurilish kompaniyasida ishlayotgan vatandoshlar uchun uyushtirildi. Uchrashuvda Buxorodagi “Xalifa Xudoydod” masjidi imom-xatibi Odiljon Sadilloev ham ishtirok etdi.

Tadbir davomida ishtirokchilar mamlakat rahbariyati nomidan Ramazon oyi munosabati bilan tabriklandi. So’zga chiqqanlar chet elda ishlab oilalarini qo’llab-quvvatlayotgan o’zbekistonliklarga minnatdorchilik bildirdi.

Yig’ilishda chet eldagi O’zbekiston fuqarolarini qo’llab-quvvatlash masalasi ham muhokama qilindi.

Iftorlik ishtirokchilari mamlakat rahbariyati va tashkilotchilariga o’z vatanlaridan uzoqda bo‘lgan fuqarolarga ko’rsatgan e’tibor uchun minnatdorchilik bildirdilar. Moskvadagi qurilish kompaniyasi xodimi Sobirjon Yo’ldoshevning so’zlariga ko’ra, kompaniyada 700 dan ortiq kishi ishlaydi, ularning aksariyati O’zbekiston fuqarolari. Uning ta’kidlashicha, bunday uchrashuvlar ularning vatan bilan aloqalarni saqlab qolishga yordam beradi.

Kompaniya xodimi Baxtiyor Boltaboyev ham tashkilotchilarga minnatdorchilik bildirdi va bunday tadbirlar, ayniqsa, uydan uzoqda bo’lgan odamlar uchun muhimligini aytdi.