Moskvada migrantlarni soxta “registratsiya” qilgan shaxs 15 yilga qamaldi

Moskvada Ramenki tuman politsiya bo’limining sobiq boshlig’i 15 yilga qattiq tartibli qamoqxonada o’tirishga hukm qilindi. Tergov natijasida u migrantlarni soxta ro’yxatdan o’tkazish uchun pul olgani aniqlandi.

Tergov qo’mitasining ma’lumotlariga ko’ra, politsiya xodimi 2017-yildan 2022-yilgacha shaxsan va vositachilar orqali pora olgan. Olingan poralarning umumiy miqdori 1,5 million rubldan ortiq deb baholanmoqda.

Sud yetarli dalillarni topdi va qamoq jazosidan tashqari 15 million rubl miqdorida jarima tayinladi. Sobiq politsiya xodimi podpolkovnik unvonidan ham mahrum qilindi.

Tergov qo’mitasi migratsiya bilan bog’liq shunga o’xshash jinoyatlar faol tergov qilinayotganini ta’kidlaydi. Migratsiya bo’limlari va huquqni muhofaza qilish organlarining boshqa xodimlariga qarshi ilgari ham migrantlar ishtirokidagi noqonuniy sxemalar va poraxo’rlikda ayblanib jinoiy ishlar qo’zg’atilgan.