🔻Moskvada reyd natijasiga ko‘ra o‘nlab muhojirlarga harbiy xizmatga chaqiruv qog‘ozi topshirildi

Moskvada Tergov qo‘mitasining harbiy tergov bo‘limi vakillari va IIV xodimlari noqonuniy migratsiya faktlarini aniqlash va sobiq muhojirlar tomonidan qonunchilikka rioya etishini nazorat qilish maqsadida reyd o‘tkazdi, deb yozadi “Kommersant”.

Ushbu tekshirish natijasida Rossiya fuqaroligini olgan bir necha o‘nlab muhojirlarga ro‘yxatga olish uchun harbiy xizmatga chaqiruv qog‘ozi berildi.

Nashrning yozishicha, reyd “Shelkovskaya” metro bekati yaqinidagi avtovokzalda, sabzavot ombori va Moskva sharqidagi yotoqxonalarda bo‘lib o‘tgan.

Ilgari bunday tekshiruvlar Moskva viloyatining Serpuxov va Chexov shaharlarida ham o‘tkazilgan: harbiy tergovchilar harbiy ro‘yxatdan o‘tmagan o‘n nafar sobiq muhojirni aniqladi, deb xabar qildi Tergov qo‘mitasining harbiy tergov boshqarmasi.

O‘tgan yilning kuzida Rossiya Federatsiyasi Tergov qo‘mitasi rahbari Aleksandr Bastrikin migrantlar Ukrainaga qarshi urushda qatnashishni istamasa, ularni fuqarolikdan mahrum qilishni taklif qilgan edi.

“Maxsus harbiy operatsiya davom etayotgan bir paytda, menimcha, ularni maxsus harbiy operatsiyaga jalb qilish kerak, agar siz Rossiya Federatsiyasi fuqarosi sifatida harbiy burchingizni bajarishga tayyor bo‘lmasangiz, bunday odamni fuqarolikdan mahrum qilish qarorini qabul qilish kerak”, degan edi u.

Shundan keyin Rossiyada muhojirlarga qarshi reydlar hollari tez-tez uchray boshladi. Xavfsizlik kuchlari Rossiya fuqaroligiga ega bo‘lgan muhojirlarni qo‘lga olib, harbiy ro‘yxatdan o‘tkazish ishlarini ko‘paytirdi. Dekabr oyida xorijiy fuqarolar harbiy ro‘yxatga olishdan bo‘yin tovlagani uchun Rossiya fuqaroligidan mahrum etila boshlagani haqida xabarlar paydo bo‘la boshladi.