Москвада янги қонун: таксичилар шаҳарни беш қўлдек билиши шарт

Москвада такси ҳайдовчилари диққатга сазовор жойлар ва шифохоналар манзилларини билиш учун текширилади.

Москва шаҳар думаси такси ҳайдовчилари маданий обидалар, транспорт  инфратузилмаси, тиббиёт ва таълим муассасалари, шунингдек, давлат бинолари жойлашган жойни билишлари учун сертификатдан ўтишлари шарт бўлган қонунни қабул қилди. Бу ҳақда Москва шаҳар думаси раиси Алексей Шапошников маълум қилди.

“Бугунги кунда биз қабул қилган янгиланган шаҳар қонунида йўловчи таксиси ва буюртма хизмати фаолиятининг ҳар бир жабҳаси бўйича кенг қамровли қоидалар белгиланган. Бундан ташқари, транспорт воситасига ҳам, ҳайдовчининг ўзига ҳам муайян талаблар белгилаб қўйилган”, — деди у журналистларга.

Унга кўра, қонун кучга киргандан сўнг такси ҳайдовчилари Москва шаҳридаги транспорт инфратузилмаси, маданий мерос объектлари, тиббиёт ва таълим муассасалари, спорт иншоотлари, давлат ҳокимияти ва бошқаруви органларининг бинолари жойлашуви ҳақидаги билимларини кўрсатиш ҳамда   маҳаллий давлат ҳокимияти органлари, шунингдек уларга мурожаат қилишнинг муайян усуллари ва фавқулодда вазиятларда ҳаракат қилиш қоидалари учун аттестациядан ўтишлари керак бўлади.

Янги қонун 2022 йил декабр ойида Россия бўйлаб йўловчи такси ташишни давлат томонидан тартибга солишнинг ҳуқуқий асосларини ўрнатган алоҳида федерал қонуннинг қабул қилиниши муносабати билан қабул қилинди.

Шаҳар қонуни Москва ҳукумати ва шаҳарнинг бошқа ижро этувчи ҳокимият органларининг йўловчи таксиларини ташишни ташкил этишда ваколатларини, шунингдек, ушбу соҳада минтақавий назорат бўйича қоидаларни белгилайди.

Шапошниковнинг таъкидлашича, янги шаҳар такси қонуни федерал қонунчиликка тўлиқ мос келади ва у билан бир вақтда, 2023 йил 1 сентябрдан кучга киради. Бу шуни англатадики, Москвадаги барча такси ҳайдовчилари шаҳардаги турли объектлар ва муассасалар манзиллари бўйича билимларини исботлаш учун аттестациядан ўтишлари керак бўлади.

Мазкур чора йўловчиларга хизмат кўрсатиш сифатини ошириш, янада самарали ва хавфсиз транспорт тизимини таъминлашга қаратилган. Диққатга сазовор жойлар, шифохоналар ва бошқа муҳим жойлар манзилларини билиш такси ҳайдовчиларига йўловчиларни керакли манзилга аниқроқ ва тезроқ етказишда ёрдам беради.