O‘zbekistonda taqiqlangan internet manbalari soni oshdi

O‘zbekiston Respublikasi Oliy sudi tomonidan internet tarmog‘idagi taqiqlangan manba va kontentlar ro‘yxati yangilandi.

Yangi ma’lumotlarga ko‘ra, 2026-yil 6-aprel holatiga bu kabi resurslar soni sezilarli darajada oshgan.

Rasmiy ma’lumotlarga ko‘ra, diniy ekstremizm, terrorizm va aqidaparastlik g‘oyalarini targ‘ib qiluvchi materiallar kiritilgan ro‘yxatdagi manbalar soni 1837 taga yetgan. Bu ko‘rsatkich 2025 yil 8 yanvar holatiga nisbatan 244 taga ko‘paygan (o‘shanda 1593 ta edi).

Tahlillarga ko‘ra, taqiqlangan kontent eng ko‘p ijtimoiy tarmoqlarda tarqalayotgani qayd etilgan.
• Instagram — 121 taga oshgan
• Telegram — 65 taga ko‘paygan
• YouTube — 23 taga oshgan
• Facebook (Meta) — 21 taga ko‘paygan

Bundan tashqari, TikTok, Odnoklassniki va turli veb-saytlarda ham o‘sish kuzatilgan. Shuningdek, ilk bor Threads platformasida ham shunday kontent aniqlangan.

Mutaxassislar fikricha, bu holat radikal g‘oyalar tarqalishi hali ham davom etayotganini ko‘rsatadi. Ayniqsa, qisqa va vizual formatdagi platformalar orqali bunday materiallar tez tarqalmoqda.

Mas’ul idoralar fuqarolarni, ayniqsa yoshlar va ota-onalarni ogohlikka chaqirmoqda.

Aqidani buzuvchi, ekstremistik va terrorchilik g‘oyalarini tarqatuvchi manbalardan uzoq bo‘lish, bunday kontentdan foydalanmaslik muhim ekani ta’kidlandi.

Yangilangan ro‘yxat internetdagi xavfli kontent hajmi ortib borayotganini ko‘rsatadi. Shu bois, fuqarolardan axborot manbalarini tanlashda ehtiyotkor bo‘lish va faqat ishonchli resurslardan foydalanish talab etiladi.