Oʻzbekistonlik diplomatlar AQShda hibsga olingan vatandoshlarni ziyorat qilishdi

Oʻzbekistonning Qoʻshma Shtatlardagi elchixonasi xodimlari Virjiniya shtatidagi xorijiy fuqarolar uchun vaqtinchalik saqlash markazlari — Kerolayn va Farmvilga tashrif buyurdi. Diplomatlar u yerda hibsda saqlanayotgan Oʻzbekiston fuqarolari bilan uchrashishdi.

Tashriflar davomida elchixona vakillari hibsda saqlash sharoitlari, vatandoshlarning sogʻligʻi, ovqatlanishi va boshqa kundalik masalalar bilan tanishdi. Shuningdek, oʻzbekistonliklarga konsullik huquqlari va huquqiy masalalarini tushuntirildi.

Oʻzbekiston fuqarolari diplomatlarga Qoʻshma Shtatlarga noqonuniy kirish uchun hibsga olinganliklarini maʼlum qilishdi. Ular hozirda deportatsiya jarayoni bilan yuzlashmoqda. Ular oʻz vatanlariga qaytarish jarayonini tezlashtirishda yordam soʻrashdi.

Elchixona oʻz vakolatlari doirasida fuqarolarni Oʻzbekistonga qaytarish boʻyicha Amerika tomoni bilan muzokaralar olib borishga va zarur hujjatlarni olishda amaliy yordam koʻrsatishga tayyorligini bildirdi.

Shu bilan birga, diplomatik missiya xorijdagi Oʻzbekiston fuqarolariga kelgan mamlakatlar qonunlariga rioya qilish va u yerda qonuniy ravishda qolish zarurligini eslatdi. AQSh immigratsiya siyosatidagi oʻzgarishlar tufayli bu talablar ayniqsa muhimdir.

Avvalroq, 21-yanvar kuni AQShdan noqonuniy ravishda bo’lgani uchun deportatsiya qilingan 44 nafar O’zbekiston fuqarosi charter reys bilan Toshkentga qaytarilgan edi.