Пенза яқинида бир неча ўзбекистонлик ҳалок бўлди

Фалокат Москва вақти билан тахминан соат 3.00 да М-5 “Урал” федерал автомагистралининг 504-километрида содир бўлган.

Пенза вилоятидаги Урал федерал трассасида микроавтобус ва юк машинаси билан содир бўлган ЙТҲда ҳалок бўлганлар Ўзбекистон фуқаролари бўлган, деб хабар бермоқда Нижнеломов туманлараро прокурори Андрей Ярош телеграмда.

Пенза вилояти йўл полициясининг хабар беришича, Москва вақти билан тахминан соат 3.00 да М-5 “Урал” федерал автомагистралининг 504-километрида Москва томон кетаётган минивэн ҳайдовчиси, 1981 йилда туғилган эркак қарама-қарши йўлга чиқиб, Волво юк машинаси билан тўқнашган. Микроавтобусда содир бўлган ЙТҲ натижасида етти киши ҳалок бўлган, яна икки киши жароҳатланган. Фавқулодда хизматларнинг аниқлик киритишича, жароҳатланганлардан бири вафот этган, яна бири оғир аҳволда касалхонага ётқизилган.

“Аиқланишича, Volvo автомобили ва Ўзбекистон фуқаролари бўлган JAС минивэни иштирокида ЙТҲ содир бўлган. Ҳозир ҳодиса сабаблари аниқланмоқда”, — деган Ярош вилоят прокуратурасининг Телеграм-каналида эълон қилинган видеода.

Илгарироқ вилоят прокуратураси JAC М3 микроавтобуси чет эл давлат рақамларига эга бўлганини маълум қилганди. “РИА Новости”нинг ҳуқуқ-тартибот идораларидаги манбасига кўра, микроавтобусда Ўзбекистон давлат рақамлари бўлган.

Россия Тергов қўмитасининг вилоят бошқармаси ЙТҲда саккиз кишининг ўлимидан сўнг кўрсатилаётган хизматлар сифати пастлиги бўйича жиноий иш қўзғатилганини маълум қилди.

Аллоҳ вафот этган ҳамюртларимизни раҳматига олсин! Ҳамюртларимиздан техника хавфсизлиги ва йўл қоидаларига риоя қилишни, узоқ йўлларда кетаётганда вақтида дам олишни сўраб қоламиз. Ўзингизни ва яқинларингизни асранг!