Peterburgga sayyohlar kelishi nega kamaydi?

Sankt Peterburg mehmonxonalardagi yuqori narxlar va dron hujumlari sababli turistlarni yoʻqotmoqda. Yanvardan maygacha boʻlgan davrda shahar mehmonxonalarining bandligi 59% dan 56% gacha kamaydi. Bu 2022-yildan beri sayyohlar oqimining birinchi pasayishidir. Bunday ma’lumotlarni IBC Real Estate konsalting kompaniyasi Hotel Advisors ma’lumotlari asosida keltirmoqda. Kompaniya bosh direktori Aleksey Yefimovning hisoblashicha, odamlar shunchaki pul tejashni boshlashgan.

Eng koʻp ekonom klassdagi arzon mehmonxonalar zarar koʻrdi. Xonaning oʻrtacha narxi 3,6 ming rubl boʻlgan mehmonxonalarning bandligi 58% dan 49% gacha tushib ketdi. Bunday joylardagi narxlar bir yil ichida 16% ga oshdi. Shu sababli mijozlar kvartira va apartamentlarni ijaraga olishni koʻproq afzal koʻra boshlagan.

Biroq ijaraga beriladigan uy joy egalari ham mijoz kamayganidan shikoyat qilmoqda. Band qilishlarni bekor qilishning asosiy sababi sifatida ular dronlar hujumini koʻrsatmoqda. Odamlar hujumlar haqidagi xabarlardan soʻng darhol safarlarini bekor qilmoqda. Sayyohlarni nafaqat portlashlarning oʻzi, balki bu bilan bogʻliq muammolar ham qoʻrqitmoqda. Bularga aeroportlarning yopilishi, internetning oʻchirilishi yoki benzin taqchilligi kiradi. Gubernator Aleksandr Beglov tarmoqda uzilishlar yuz bersa, turistlarga qogʻoz xaritalarni tarqatishga va’da bergan. «Tari tur SPb» kompaniyasi bosh direktorining oʻrinbosari Oksana Lebedeva osmondagi cheklovlar tufayli turistlar band qilishlarni bekor qilayotganini yoki safarlarni rejalashtirishdan qoʻrqayotganini tasdiqlaydi.

Shu bilan birga, Sankt Peterburgda yashash poytaxtdagiga qaraganda qimmatroq turadi. Hatto birinchi chorak yakunlariga koʻra, shahar mehmonxona narxlari boʻyicha Moskvani ortda qoldirdi. «Russkiy Standart» banki ma’lumotlariga koʻra, Sankt Peterburgda yashash uchun oʻrtacha chek 16 654 rublni, Moskvada esa 11 546 rublni tashkil etgan. Sankt Peterburgda jami 19,6 mingta sertifikatlangan mehmonxona xonalari faoliyat koʻrsatmoqda.

Markaziy bank soʻrovnomalari Rossiyaning aksariyat hududlarida sayyohlar kamayganini koʻrsatmoqda. Ichki turizm oddiy odamlar uchun juda qimmat boʻlib qoldi. Rossiya boʻylab sayohatlar narxi inflyatsiyadan tezroq oʻsdi. Shu bilan birga, rubl kursi mustahkamlandi, shu sababli rossiyaliklar uchun chet elda dam olish foydaliroq boʻlib qoldi. Fuqarolarning xorijiy safarlarga qilgan xarajatlari soʻnggi 11 yildagi rekordni yangiladi. May oyida sayyohlar oqimining kamayishiga qisqa bayram kunlari ham ta’sir koʻrsatdi.

Faqat qimmatbaho mehmonxonalardagina mijozlar bilan bogʻliq muammolar yoʻq. Bir kecha uchun oʻrtacha xona narxi 31,5 ming rubl boʻlgan mehmonxonalarda bandlik 43% dan 45% gacha oshdi. Hashamatli uy joy egalari boy odamlar kelishda davom etayotganini aytmoqda. Masalan, Peterburg xalqaro iqtisodiy forumiga odatdagidan ham koʻproq ishtirokchi kelgan. Bunday mehmonlarning qimmatbaho uy joy va transport uchun pullari yetarli, shuning uchun ularni hech narsa qoʻrqitmaydi.